હિઝબુલ્લાહના લડવૈયાઓએ ઇઝરાયેલના દક્ષિણી બંદર અશ્દોદ સ્થિત લશ્કરી નૌકા મથક પર મિસાઇલ છોડી છે. હિઝબુલ્લાએ એક નિવેદન જારી કરીને હુમલાની જવાબદારી સ્વીકારી છે. જૂથે જણાવ્યું હતું કે ઇઝરાયેલ દ્વારા યુદ્ધવિરામ કરારના વારંવાર ઉલ્લંઘન અને બેરૂત પર સતત હુમલાના જવાબમાં આ કાર્યવાહી કરવામાં આવી હતી. આ હુમલાથી વિસ્તારમાં તણાવ વધુ વધી ગયો છે. આ હુમલા અંગે ઈઝરાયેલ તરફથી હજુ સુધી કોઈ સત્તાવાર પ્રતિક્રિયા આવી નથી.
હિઝબુલ્લાહે ચેતવણી આપી છે કે જ્યાં સુધી ઇઝરાયેલ અને અમેરિકા લેબનોન અને તેના લોકો સામે આક્રમણ બંધ નહીં કરે ત્યાં સુધી આવી કાર્યવાહી ચાલુ રહેશે. જૂથનું કહેવું છે કે ઇઝરાયેલ સતત યુદ્ધવિરામનું ઉલ્લંઘન કરી રહ્યું છે અને લેબનોનની રાજધાની બેરૂત સહિત વિવિધ વિસ્તારોમાં હવાઈ હુમલા કરી રહ્યું છે. આ હુમલાઓથી લેબનોનમાં ભારે નુકસાન થઈ રહ્યું છે. લેબનીઝ આરોગ્ય મંત્રાલયના પ્રારંભિક ડેટા અનુસાર, બુધવારે ઇઝરાયેલના હુમલામાં 303 લોકોના મોત થયા હતા અને 1,150 થી વધુ લોકો ઘાયલ થયા હતા.
લેબનોન પર હુમલાને કારણે ચિંતા વધી
ઈરાન અને અમેરિકા વચ્ચે 2 સપ્તાહનો યુદ્ધવિરામ બુધવારથી લાગુ થઈ ગયો છે. આ વિરામ હેઠળ પાકિસ્તાનના ઈસ્લામાબાદમાં શાંતિ મંત્રણા શરૂ થવા જઈ રહી છે. જોકે, ઈઝરાયેલે કહ્યું છે કે આ યુદ્ધવિરામ લેબનોનમાં ચાલી રહેલા સંઘર્ષ પર લાગુ પડતો નથી. ઈરાન અને મધ્યસ્થી પાકિસ્તાન આ વલણનો વિરોધ કરી રહ્યા છે. તેહરાનનું કહેવું છે કે લેબનોન કરારનો અવિભાજ્ય ભાગ છે. આ વિવાદને કારણે પ્રાદેશિક સ્થિરતા પર સવાલો ઉઠી રહ્યા છે.
