બ્રિટનની રાજધાની લંડનમાંથી તાજેતરમાં એક ચોંકાવનારો કિસ્સો સામે આવ્યો છે. અહીંની એક પ્રાથમિક શાળામાં હિંદુ વિદ્યાર્થી સાથે ભેદભાવ કર્યા બાદ તેને શાળા છોડવાની ફરજ પડી હતી. અહેવાલો અનુસાર, 8 વર્ષના એક હિન્દુ વિદ્યાર્થીને કપાળ પર તિલક લગાવવાને કારણે આ બધાનો સામનો કરવો પડ્યો હતો.
બ્રિટિશ હિંદુ અને ભારતીય સમુદાયનું પ્રતિનિધિત્વ કરતી એક સામાજિક ચળવળ અને હિમાયત સંસ્થા, ઇનસાઇટ યુકેના જણાવ્યા અનુસાર, આ કેસ લંડનની વિકર્સ ગ્રીન પ્રાઇમરી સ્કૂલનો છે. એનડીટીવીના એક અહેવાલ મુજબ, શાળાના સ્ટાફે બાળકને તેની ધાર્મિક વિધિઓ સમજાવવા અને યોગ્ય ઠેરવવા કહ્યું. સંસ્થાએ આ વર્તનને સગીર માટે સંપૂર્ણપણે અયોગ્ય ગણાવ્યું છે.
વિદ્યાર્થીના માતા-પિતાએ અન્ય હિંદુ માતા-પિતા સાથે મળીને મુખ્ય શિક્ષક અને શાળાના સંચાલકોને હિંદુ ધાર્મિક વિધિઓના ધાર્મિક મહત્વ વિશે સમજાવવાના પ્રયત્નો કર્યા હતા પરંતુ શાળા દ્વારા તેને નકારી કાઢવામાં આવ્યો હતો.
આરોપ છે કે સ્કૂલના હેડ ટીચરે બ્રેકના સમયે પણ બાળક પર એવી રીતે નજર રાખી કે બાળક ડરી ગયો અને તેના મિત્રોથી અલગ થઈ ગયો. તિલક લગાવવાને કારણે બાળકને શાળામાં કેટલીક પોસ્ટ પરથી હટાવવામાં આવ્યો હોવાના આક્ષેપો પણ કરવામાં આવ્યા છે. વિકર્સ ગ્રીન પ્રાઈમરી સ્કૂલમાં ધાર્મિક ભેદભાવને કારણે ઓછામાં ઓછા ચાર બાળકોને શાળા છોડવાની ફરજ પડી છે, એક વકીલ જૂથે અહેવાલ આપ્યો છે.
