આગામી T20 વર્લ્ડ કપ 2026 માટે ભારતીય ટીમ ફાઈનલ થઈ ગઈ છે. શનિવારે બીસીસીઆઈ સચિવ દેવજીત સૈકિયા, કેપ્ટન સૂર્યકુમાર યાદવ અને મુખ્ય પસંદગીકાર અજીત અગરકર સાથેની બેઠક બાદ 15 સભ્યોની ટીમની જાહેરાત કરવામાં આવી હતી. ભારતીય ટીમ ડિફેન્ડિંગ ચેમ્પિયન છે, પરંતુ જૂન 2024માં ચેમ્પિયન બની ત્યારથી, ભારતીય T20 ટીમ ફેરફારોમાંથી પસાર થઈ છે અને ટીમના દિગ્ગજ ખેલાડી રોહિત શર્મા, વિરાટ કોહલી અને રવિન્દ્ર જાડેજાએ T20 ઈન્ટરનેશનલમાંથી નિવૃત્તિ લઈ લીધી છે. જો કે હવે સૂર્યકુમાર યાદવની કપ્તાનીમાં ટીમ ટાઈટલ જીતવાની પ્રબળ દાવેદાર છે. તે જ સમયે, ગત વર્લ્ડ કપની ટીમના આઠ ખેલાડીઓ આગામી T20 વર્લ્ડ કપ 2026 માટે ટીમમાં જગ્યા બનાવવામાં સફળ થયા છે.
ભારતીય ક્રિકેટ કંટ્રોલ બોર્ડે ન્યૂઝીલેન્ડ સામેની પાંચ મેચની T20 શ્રેણી અને ત્યારપછીના મેન્સ T20 વર્લ્ડ કપ 2026 માટે ભારતની 15 સભ્યોની ટીમમાં ઈશાન કિશન અને રિંકુ સિંહનો સમાવેશ કર્યો છે. તાજેતરમાં જ ઈજાગ્રસ્ત થયેલા શુભમન ગિલને ટીમમાં સ્થાન મળી શક્યું નથી. આ વખતે ભારતની અગાઉની T20 વર્લ્ડ કપ 2024 ટીમના કુલ આઠ ખેલાડીઓ વર્તમાન ટીમમાં સામેલ છે. તેમાં સૂર્યકુમાર યાદવ, જસપ્રિત બુમરાહ, હાર્દિક પંડ્યા અને કુલદીપ યાદવ જેવા ખેલાડીઓ છે.
આ ખેલાડીઓ નિવૃત્ત થયા
ભારતના દિગ્ગજ બેટ્સમેન રોહિત શર્મા, વિરાટ કોહલી અને રવિન્દ્ર જાડેજાએ T20 વર્લ્ડ કપ 2024નો ખિતાબ જીત્યા બાદ T20 ઈન્ટરનેશનલમાંથી નિવૃત્તિ લઈ લીધી હતી. આ ત્રણ ખેલાડીઓએ ભારતને વર્લ્ડ ચેમ્પિયન બનાવવામાં મહત્વની ભૂમિકા ભજવી હતી.
T20 વર્લ્ડ કપ ટીમમાં નવા ચહેરાઓ
વિશ્વના નંબર વન T20 બેટ્સમેન અભિષેક શર્મા ટૂર્નામેન્ટમાં ભારત માટે ઇનિંગ્સની શરૂઆત કરશે. રિંકુ સિંહ, તિલક વર્મા, વોશિંગ્ટન સુંદર અને હર્ષિત રાણા પ્રથમ વખત T20 વર્લ્ડ કપ રમશે. ટીમમાં વરુણ ચક્રવર્તી અને ઈશાન કિશનનો સમાવેશ કરવામાં આવ્યો છે. આ બંને ખેલાડીઓ 2021ના T20 વર્લ્ડ કપનો ભાગ રહી ચૂક્યા છે. સૈયદ મુશ્તાક અલી ટ્રોફીમાં લગભગ 200ના સ્ટ્રાઈક રેટથી 500થી વધુ રન બનાવીને ઝારખંડને પોતાની કપ્તાનીમાં ચેમ્પિયન બનાવનાર ઈશાન કિશનની ભારતીય ટીમમાં વાપસી થઈ છે. તેણે ટૂર્નામેન્ટમાં માત્ર 10 ઇનિંગ્સમાં 57.32ની એવરેજથી 517 રન બનાવ્યા અને તેનો સ્ટ્રાઇક રેટ 197.32 હતો. તેણે હરિયાણા સામેની ફાઇનલમાં સદી (49 બોલમાં 101 રન) સહિત બે અડધી સદી અને બે સદી ફટકારી હતી.
આ ખેલાડીઓ બહાર છે
અનુભવી વિકેટકીપર બેટ્સમેન ઋષભ પંત, મોહમ્મદ સિરાજ અને યુઝવેન્દ્ર ચહલ T20 વર્લ્ડ કપ 2024 માટે ભારતીય ટીમનો ભાગ હતા પરંતુ આ વખતે તેમને T20 વર્લ્ડ કપ 2026માં સામેલ કરવામાં આવ્યા નથી. આ ખેલાડીઓએ 2025માં ભારત માટે એક પણ T20 મેચ રમી નથી.
