ગોવાના પ્રખ્યાત ‘બિર્ચ બાય રોમિયો લેન’ નાઈટક્લબમાં લાગેલી ભીષણ આગમાં 25 લોકોના મોત બાદ ફરાર થયેલા અજય ગુપ્તાની મંગળવારે દિલ્હીથી ધરપકડ કરવામાં આવી હતી. ગુપ્તાને દિલ્હીના લાજપત નગર સ્થિત ઈન્સ્ટિટ્યૂટ ઓફ બ્રેઈન એન્ડ સ્પાઈનમાં દાખલ કરાયા બાદ પકડાયો હતો. અધિકારીઓના જણાવ્યા અનુસાર, ગુપ્તાને તેમના ડ્રાઈવર હરિયાણા નંબર પ્લેટવાળી ઈનોવા કારમાં હોસ્પિટલ લઈ ગયા હતા. જ્યારે ગુપ્તાને આ ઘટના વિશે પૂછવામાં આવ્યું તો તેણે કહ્યું, “હું માત્ર સ્લીપિંગ પાર્ટનર છું.”
એનડીટીવીના અહેવાલ મુજબ જ્યારે ગુપ્તાને પૂછપરછ કરવામાં આવી ત્યારે તેણે કહ્યું કે, હું માત્ર લુથરા ભાઈઓનો સ્લીપિંગ પાર્ટનર છું, તેનાથી વધુ કંઈ નથી.
તમને જણાવી દઈએ કે ગુપ્તા વિરુદ્ધ લુકઆઉટ નોટિસ જારી કરવામાં આવી હતી, કારણ કે ગોવા પોલીસ તેની શોધમાં તેના ઘરે પહોંચી હતી પરંતુ તે ત્યાં મળ્યો ન હતો. હવે તેને ટૂંક સમયમાં સાકેત કોર્ટમાં રજૂ કરવામાં આવશે. ગોવા પોલીસ ગુપ્તાના ટ્રાન્ઝિટ રિમાન્ડની પણ માંગ કરશે જેથી કરીને તેને વધુ પૂછપરછ માટે ગોવા લઈ જઈ શકાય.
નાઈટ ક્લબના અન્ય બે માલિકો સૌરભ લુથરા અને ગૌરવ લુથરા હજુ પણ ફરાર છે. તપાસમાં જાણવા મળ્યું કે દુર્ઘટનાના થોડા કલાકો બાદ જ બંને રવિવારે સવારે 5:30 વાગ્યે ઈન્ડિગોની ફ્લાઈટમાં ફૂકેટ (થાઈલેન્ડ) જવા રવાના થયા હતા. ઘટના સમયે બંને દિલ્હીમાં હાજર હતા. ઈમિગ્રેશન બ્યુરોના રિપોર્ટ બાદ તેમની સામે બ્લુ કોર્નર નોટિસ જારી કરવામાં આવી છે. દિલ્હી અને ગોવા પોલીસ સંયુક્ત રીતે લુથરા બંધુઓ સાથે જોડાયેલા સ્થળો અને નેટવર્ક પર દરોડા પાડી રહી છે.
કેવી રીતે થયો અકસ્માત?
કોન્સર્ટ દરમિયાન નાઈટ ક્લબમાં આગ ફાટી નીકળી હતી. વીડિયોમાં દેખાઈ રહ્યું છે કે છત પર અચાનક આગની જ્વાળાઓ ઉભરાવા લાગી હતી. આખા હોલમાં ધુમાડો ફેલાઈ ગયો. આ દરમિયાન ફિલ્મ ‘શોલે’ના ‘મહેબૂબા મહેબૂબા’ ગીત પર ડાન્સ ચાલી રહ્યો હતો. પ્રાથમિક તપાસમાં એવું માનવામાં આવી રહ્યું છે કે સંગીત દરમિયાન ફટાકડાના કારણે આગ લાગી હતી.
