ઇઝરાયેલના વડા પ્રધાન બેન્જામિન નેતન્યાહુએ બુધવારે તેમના ભારતીય સમકક્ષ વડા પ્રધાન નરેન્દ્ર મોદીને તેમના સંયુક્ત રાત્રિભોજન પહેલાં પરંપરાગત ભારતીય પોશાક પહેરીને આશ્ચર્યચકિત કર્યા હતા. નેતન્યાહુએ પોતે સોશિયલ મીડિયા પ્લેટફોર્મ ‘X’ પર એક પોસ્ટ શેર કરતા પોતાનો વીડિયો જાહેર કર્યો છે. વીડિયોમાં જોઈ શકાય છે કે બેન્જામિન નેતન્યાહુએ ભારતીય અને પશ્ચિમી પોશાકનો આકર્ષક મિશ્રણ પહેર્યો છે.
તેણે સફેદ ફુલ-સ્લીવ શર્ટ પર આછું ગ્રે સ્લીવલેસ જેકેટ પહેર્યું છે, જે પરંપરાગત ભારતીય ‘નેહરુ જેકેટ’ અથવા ‘બંડી’ જેવું લાગે છે અને તેને એક ઉત્કૃષ્ટ ‘દેશી’ દેખાવ આપે છે. આ સાથે તેણે ડાર્ક કલરનું ફોર્મલ પેન્ટ અને નીચે બ્લેક લેધરના ફોર્મલ શૂઝ પહેર્યા છે. PM નેતન્યાહુએ હિન્દીમાં લખ્યું- અમારા સંયુક્ત રાત્રિભોજન પહેલા, મેં મારા મિત્ર વડાપ્રધાન મોદીને પરંપરાગત ભારતીય પોશાક પહેરીને આશ્ચર્યચકિત કર્યા.
ઇઝરાયેલની સંસદમાં પીએમ મોદીનું ઐતિહાસિક સંબોધન
અગાઉના દિવસે, પીએમ મોદીએ જેરુસલેમમાં નેસેટ (ઇઝરાયેલ સંસદ)ના વિશેષ પૂર્ણ સત્રને સંબોધિત કર્યું હતું. તેઓ ઈઝરાયેલની સંસદને સંબોધન કરનાર પ્રથમ ભારતીય વડાપ્રધાન બન્યા છે. નેસેટ પર પહોંચ્યા પછી, સ્પીકર અમીર ઓહાનાએ વડા પ્રધાનનું સ્વાગત કર્યું અને તેમને ઔપચારિક સન્માન આપવામાં આવ્યું.
વડા પ્રધાનના સંબોધન પહેલાં, ઇઝરાયેલના વડા પ્રધાન નેતન્યાહૂ, વિપક્ષી નેતા યાયર લેપિડ અને સ્પીકર ઓહાનાએ સત્રમાં વક્તવ્ય આપ્યું હતું, જે ભારત-ઇઝરાયેલ સંબંધો માટે ઇઝરાયેલના મજબૂત દ્વિપક્ષીય સમર્થનને પ્રતિબિંબિત કરે છે.
