બાંગ્લાદેશના ઓલરાઉન્ડર શાકિબ અલ હસને સ્વીકાર્યું છે કે સરે તરફથી રમતી વખતે ઇંગ્લિશ કાઉન્ટી મેચ દરમિયાન શારીરિક થાકને કારણે તેને ઇરાદાપૂર્વક ચકીંગ (ખોટી ક્રિયા સાથે બોલિંગ) કરવાનો આશરો લેવાની ફરજ પડી હતી. જેના કારણે તેને બોલિંગમાંથી સસ્પેન્ડ કરવામાં આવ્યો હતો.
ડાબા હાથના સ્પિનર શાકિબને ગયા વર્ષે ડિસેમ્બરમાં લોફબોરો યુનિવર્સિટીની સ્વતંત્ર તપાસમાં તેની બોલિંગ એક્શન ગેરકાયદેસર જણાયા બાદ ઈંગ્લેન્ડ અને વેલ્સ ક્રિકેટ બોર્ડ (ECB) દ્વારા આયોજિત તમામ સ્પર્ધાઓમાં બોલિંગ કરવાથી સસ્પેન્ડ કરવામાં આવ્યો હતો.
ટોન્ટન ખાતે સમરસેટ સામે સરેની ફર્સ્ટ-ક્લાસ મેચ દરમિયાન અમ્પાયરોએ તેની બોલિંગ એક્શન અંગે ફરિયાદ કરી હતી. તેણે આ મેચની બે ઇનિંગ્સમાં અંદાજે 65 ઓવર ફેંકી હતી.
શાકિબે બિઅર્ડ બિફોર વિકેટ પોડકાસ્ટને કહ્યું, ‘મને લાગે છે કે હું જાણી જોઈને આવું કરી રહ્યો હતો, કારણ કે મેં 70થી વધુ ઓવર (મેચમાં) ફેંકી હતી. મેં મારી કારકિર્દીમાં ક્યારેય ટેસ્ટ મેચમાં 70 ઓવર ફેંકી નથી. હું ટોન્ટન ખાતે સમરસેટ સામે સરે માટે ચાર દિવસીય મેચ રમી રહ્યો હતો. હું ખૂબ થાકી ગયો હતો.’
