IDFC ફર્સ્ટ બેન્કમાં રૂ. 590 કરોડની છેતરપિંડીનો ખુલાસો થયા બાદ સોમવારે બેન્કના શેરમાં 20%નો ઘટાડો થયો હતો. જોકે, બાદમાં શેરમાં થોડી રિકવરી જોવા મળી હતી અને સવારે 10:33 વાગ્યા સુધીમાં શેર NSE પર 15.83% અથવા રૂ. 13.22 ઘટીને રૂ. 70.29 અને BSE પર રૂ. 15.79% અથવા રૂ. 13.19 ઘટીને રૂ. 70.37 પર ટ્રેડ કરી રહ્યો હતો.
ચંદીગઢ શાખામાં ગરબડ, ચાર અધિકારીઓને સસ્પેન્ડ
બેંકે એક નિયમનકારી ફાઇલિંગમાં જણાવ્યું હતું કે પ્રથમ દૃષ્ટિએ, અમુક કર્મચારીઓએ ચંદીગઢની એક શાખામાં હરિયાણા રાજ્ય સરકારના અમુક ખાતાઓમાં અનધિકૃત અને કપટપૂર્ણ પ્રવૃત્તિઓ કરી છે. અન્ય વ્યક્તિઓ અથવા સંસ્થાઓ પણ સામેલ હોઈ શકે છે. બેંકે કહ્યું કે આ મામલે બેંકિંગ રેગ્યુલેટરને જાણ કરવામાં આવી છે અને પોલીસમાં ફરિયાદ દાખલ કરવામાં આવી છે.
આંતરિક તપાસ દરમિયાન ચાર શંકાસ્પદ અધિકારીઓને સસ્પેન્ડ કરવામાં આવ્યા છે. બેંકે સ્પષ્ટતા કરી કે જ્યાં સુધી તપાસ પૂર્ણ ન થાય ત્યાં સુધી ચાર અધિકારીઓને સસ્પેન્ડ કરવામાં આવ્યા છે. જવાબદાર કર્મચારીઓ અને બહારના લોકો સામે લાગુ કાયદા હેઠળ કડક શિસ્ત, સિવિલ અને ફોજદારી પગલાં લેવામાં આવશે.
KPMG ફોરેન્સિક ઓડિટ કરશે
મામલાની ગંભીરતાને ધ્યાનમાં લઈને બેંકે સ્વતંત્ર ફોરેન્સિક ઓડિટ માટે KPMGની નિમણૂક કરી છે. બેંકનું કહેવું છે કે ઓડિટ સમગ્ર ઘટના અને જવાબદારીઓનું સ્પષ્ટ ચિત્ર જાહેર કરશે. 590 કરોડની છેતરપિંડીના ઘટસ્ફોટથી બેંકની વિશ્વસનીયતા અને રોકાણકારોના વિશ્વાસ પર મોટો પ્રશ્ન ઊભો થયો છે.
