ગુજરાતના અમદાવાદમાં એક મહિલા દ્વારા જ્વેલરી શોપ લૂંટવાના નિષ્ફળ પ્રયાસનો વીડિયો સોશિયલ મીડિયા પર વાયરલ થઈ રહ્યો છે. દુકાનની અંદર લાગેલા સીસીટીવી કેમેરાના ફૂટેજમાં જોઈ શકાય છે કે કેવી રીતે એક સતર્ક દુકાનદારે માત્ર થોડી જ સેકન્ડોમાં લૂંટારૂ મહિલાનો પ્લાન નિષ્ફળ બનાવી દીધો અને તેને સારો પાઠ પણ ભણાવ્યો.
ઈન્ડિયા ટુડેના અહેવાલ મુજબ, જ્વેલરીની દુકાનમાં લૂંટના નિષ્ફળ પ્રયાસની આ ઘટના અમદાવાદના રાણીપ વિસ્તારમાં બની હતી. લૂંટારૂ મહિલા ગ્રાહક બનીને દુકાનમાં આવી હતી. મહિલાએ દુપટ્ટાથી પોતાનો ચહેરો અડધો ઢાંકી દીધો હતો અને દુકાનદારની સામે બેઠી હતી. દરમિયાન તેણે અચાનક દુકાનદાર પર મરચાનો પાવડર ફેંકી દીધો હતો.
જો કે, સતર્ક દુકાનદાર ઝડપથી હુમલામાંથી બચી ગયો, તેણે મહિલાને પકડી લીધી અને ગુસ્સામાં તેને એક પછી એક થપ્પડ મારી. તેને લગભગ 20 સેકન્ડમાં 17 વાર થપ્પડ મારવામાં આવી અને પછી તેને દુકાનની બહાર ધકેલી દેવામાં આવી. આ સીસીટીવી ફૂટેજ સોશિયલ મીડિયા પર વાયરલ થયો છે.
રાણીપ પોલીસે સીસીટીવી ફૂટેજના આધારે આરોપી મહિલાની શોધખોળ શરૂ કરી છે. જણાવવામાં આવી રહ્યું છે કે પોલીસ આવે તે પહેલા જ મહિલા સ્થળ પરથી ભાગી ગઈ હતી.
