શનિવારે રાત્રે ફિરોઝપુરમાં RSS નેતાના પુત્રની માથામાં ગોળી મારીને હત્યા કરવામાં આવી હતી. મૃતકની ઓળખ નવીન અરોરા તરીકે થઈ છે. તેઓ પંજાબના રાષ્ટ્રીય સ્વયંસેવક સંઘના વરિષ્ઠ નેતા બલદેવ રાજ અરોરાના પુત્ર હતા. તેમના દાદા દીનાનાથ અરોરા સ્વતંત્રતા યુગ દરમિયાન આરએસએસના નેતા હતા. નવીન શહેરના મોચી બજારમાં મણિયારીની દુકાન ચલાવતો હતો. શનિવારે રાત્રે તે પોતાની દુકાન બંધ કરીને ઘરે જઈ રહ્યો હતો, ત્યારે રસ્તામાં બે બદમાશોએ આવીને તેના પર ગોળીબાર કર્યો. નવીનને માથામાં ગોળી વાગતાં તેનું ઘટનાસ્થળે જ મોત થયું હતું. ગુનો કર્યા બાદ આરોપી શહેરના બાણ બજાર તરફ ભાગી ગયો હતો. માહિતી મળતા જ પોલીસ ઘટના સ્થળે પહોંચી ગઈ હતી અને તપાસ શરૂ કરી હતી.
ટાર્ગેટ કિલિંગનો મામલો લાગે છે
નવીન અરોરા શનિવારે રાત્રે પોતાની દુકાન બંધ કરીને પોતાના ઘરે જઈ રહ્યા હતા. રસ્તામાં યુકો બેંક પાસે બજારની વચ્ચે તેમના પર ગોળીઓ વરસાવી હતી. ગોળીબાર થતાં સ્થળ પર નાસભાગ મચી ગઈ હતી. આસપાસના લોકો તેને તાત્કાલિક હોસ્પિટલ લઈ ગયા, જ્યાં ડોક્ટરોએ તેને મૃત જાહેર કર્યો. પોલીસે મૃતદેહને પોતાના કબજામાં લઈ સિવિલ હોસ્પિટલ મોકલી આપ્યો હતો. હુમલાખોરોની ઓળખ અને ધરપકડ કરવા માર્કેટમાં લાગેલા સીસીટીવી કેમેરાના ફૂટેજની તપાસ કરવામાં આવી રહી છે. પ્રાથમિક તપાસમાં પોલીસ આ ટાર્ગેટ કિલિંગનો મામલો માની રહી છે.
સરકાર સામે સૂત્રોચ્ચાર કરતા ભાજપના આગેવાનો, વેપારીઓમાં રોષ
શહેરની મધ્યમાં બનેલી આ ઘટના બાદ ગભરાટ ફેલાઈ ગયો હતો. વિરોધમાં સમગ્ર બજાર બંધ રહ્યું હતું. ભાજપના નેતાઓ રસ્તા પર ઉતરી આવ્યા હતા અને સરકાર અને પ્રશાસન વિરુદ્ધ સૂત્રોચ્ચાર કર્યા હતા. તેમણે કહ્યું કે પંજાબમાં ગુનેગારોમાં કાયદા અને પોલીસનો ડર નથી. રોજ ખુલ્લેઆમ હત્યાઓ થઈ રહી છે અને સરકાર બેઠી છે. તેમણે પોલીસ પાસે માંગ કરી છે કે જેમણે આ દુષ્કર્મ કર્યું છે તેમની વહેલી તકે ધરપકડ કરવામાં આવે. વેપારી મંડળના પ્રમુખ અશ્વિની મહેતાએ આ ઘટનાને સખત શબ્દોમાં વખોડી કાઢી છે. તેમણે કહ્યું કે આ ઘટનાએ ફરી એકવાર સાબિત કર્યું છે કે પંજાબમાં કાયદો અને વ્યવસ્થા પડી ભાંગી છે. સરકારે આ અંગે ગંભીરતા દાખવવી પડશે નહીં તો રોજેરોજ લોકો આમ જ મરતા રહેશે. દરમિયાન ઘટના બાદ પોલીસની ટીમોએ હુમલાખોરોની શોધખોળ શરૂ કરી છે. શહેરમાં એલર્ટ જારી કરવામાં આવ્યું છે અને નાકાબંધી કરી દેવામાં આવી છે.
