અંડર-19 એશિયા કપના ગ્રુપ Aની પ્રથમ મેચમાં ભારતે સંયુક્ત આરબ અમીરાત સામે 433 રનનો જંગી સ્કોર બનાવ્યો છે. આ સાથે ભારતીય અંડર-19 ટીમે પણ એક મોટી સિદ્ધિ હાંસલ કરી છે. ભારતીય ટીમ અંડર-19 એશિયા કપમાં 400થી વધુ સ્કોર કરનાર પ્રથમ ટીમ બની ગઈ છે. UAE સામેની અંડર-19 એશિયા કપની મેચમાં પ્રથમ બેટિંગ કરતા ભારતીય ટીમે વિસ્ફોટક બેટ્સમેન વૈભવ સૂર્યવંશીની સદીની ઇનિંગની મદદથી 50 ઓવરમાં 6 વિકેટ ગુમાવીને 433 રન બનાવ્યા હતા. અગાઉ એશિયા યુથ/અંડર-19 કપમાં સૌથી વધુ સ્કોર બાંગ્લાદેશના નામે હતો, જેણે કતાર સામે 50 ઓવરમાં 7 વિકેટ ગુમાવીને 363 રન બનાવ્યા હતા.
ટોસ જીત્યા બાદ UAEએ પ્રથમ બોલિંગ કરવાનો નિર્ણય કર્યો હતો. બેટિંગ કરવા આવેલી ભારતીય ટીમની શરૂઆત સારી રહી ન હતી અને ત્રીજી ઓવરમાં જ કેપ્ટન આયુષ મ્હાત્રે (ચાર)ની વિકેટ ગુમાવી દીધી હતી. આ પછી બેટિંગ કરવા આવેલા એરોન જ્યોર્જે વૈભવ સૂર્યવંશી સાથે મળીને ઇનિંગ્સને સંભાળી હતી. બંને બેટ્સમેન વચ્ચે બીજી વિકેટ માટે 212 રનની ભાગીદારી થઈ હતી. આ દરમિયાન વૈભવ સૂર્યવંશીએ શાનદાર બેટિંગનું પ્રદર્શન કર્યું અને 56 બોલમાં પોતાની સદી પૂરી કરી. એરોન જ્યોર્જે પણ પોતાની અડધી સદી ફટકારી હતી. 28મી ઓવરમાં યૈન રાયે એરોન જ્યોર્જને આઉટ કરીને આ ભાગીદારી તોડી હતી. એરોન જ્યોર્જે 73 બોલમાં સાત ચોગ્ગા અને એક છગ્ગા સાથે 69 રનની ઇનિંગ રમી હતી.
ભારતની ત્રીજી વિકેટ 33મી ઓવરમાં વૈભવ સૂર્યવંશીના રૂપમાં પડી હતી. વૈભવે 95 બોલમાં 9 ચોગ્ગા અને 14 છગ્ગા સાથે 171 રનની ઇનિંગ રમી હતી. આ પછી વેદાંત ત્રિવેદી (38) અને વિહાન મલ્હોત્રા 55 બોલમાં (69) રન બનાવીને આઉટ થયા હતા. તેણે પોતાની ઇનિંગમાં સાત ચોગ્ગા અને એક છગ્ગા પણ ફટકાર્યા હતા. કનિષ્ક ચૌહાણ (28) છઠ્ઠી વિકેટ તરીકે આઉટ થયો હતો. ભારતે નિર્ધારિત 50 ઓવરમાં છ વિકેટે 433 રનનો વિશાળ સ્કોર બનાવ્યો હતો. અભિજ્ઞાન કુંડુ 17 બોલમાં (32) અને ખિલન પટેલ (પાંચ) રન બનાવીને અણનમ રહ્યા હતા.
