મોસ્કો: રશિયાએ સ્પષ્ટપણે કહ્યું છે કે ભારતે તેની પાસેથી ક્રૂડ ઓઈલ ખરીદવાનું બંધ કરવાના કોઈ સંકેત આપ્યા નથી. રશિયાએ અમેરિકાના દાવાને ફગાવી દીધો હતો કે ભારત રશિયન તેલની ખરીદી બંધ કરવા સંમત છે. રશિયાનું કહેવું છે કે તેને ભારતની નીતિમાં કોઈ ફેરફાર જોવા મળ્યો નથી.
અમેરિકાના વિદેશ મંત્રી માર્કો રૂબિયોના તાજેતરના દાવા બાદ આ નિવેદન આવ્યું છે. તેમણે કહ્યું હતું કે ભારતે રશિયા પાસેથી તેલની આયાત બંધ કરવાનું વચન આપ્યું છે.
રશિયાના વિદેશ મંત્રાલયના પ્રવક્તા મારિયા ઝાખારોવાએ કહ્યું કે રશિયા પાસે માનવાનું કોઈ કારણ નથી કે નવી દિલ્હીએ ઊર્જાની આયાત પર તેની સ્થિતિ બદલી છે. તેમના મતે, ભારત દ્વારા રશિયન હાઇડ્રોકાર્બનની ખરીદી બંને દેશો માટે ફાયદાકારક છે અને તે આંતરરાષ્ટ્રીય ઉર્જા બજારમાં સ્થિરતા જાળવી રાખે છે.
અમેરિકાના દાવા પર પ્રતિક્રિયા
મારિયા ઝખારોવાએ એમ પણ કહ્યું કે અમેરિકા દ્વારા કરવામાં આવી રહેલા દાવાઓમાં કંઈ નવું નથી. તેમણે આરોપ લગાવ્યો કે અમેરિકા ઘણીવાર સ્વતંત્ર દેશો પર દબાણ લાવવાનો પ્રયાસ કરે છે. તાજેતરના દિવસોમાં, અમેરિકી વહીવટીતંત્રે કહ્યું છે કે ભારતે રશિયા પાસેથી તેલની આયાત બંધ કરવાનું કહ્યું છે અને આ કારણોસર, કેટલીક ભારતીય વસ્તુઓ પર ટેરિફમાં રાહત આપવામાં આવી છે.
અમેરિકી રાષ્ટ્રપતિ ડોનાલ્ડ ટ્રમ્પના વહીવટીતંત્ર તરફથી એવા સંકેત પણ મળ્યા છે કે નવી દિલ્હીએ રશિયન ક્રૂડ ઓઈલની ખરીદી ઘટાડવા અથવા બંધ કરવાની ખાતરી આપી છે.
ભારતનું સત્તાવાર વલણ
આ મુદ્દે ભારત સરકાર તરફથી હજુ સુધી કોઈ સ્પષ્ટ નિવેદન આવ્યું નથી. અમેરિકા સાથેના કોઈપણ કરારમાં રશિયા પાસેથી તેલની આયાત રોકવાનો સમાવેશ થાય છે કે કેમ તે સ્પષ્ટ કરવામાં આવ્યું નથી. નવી દિલ્હીનું કહેવું છે કે ઉર્જા ખરીદી સંબંધિત દરેક નિર્ણય રાષ્ટ્રીય હિત અને વધુ સારી ડીલને ધ્યાનમાં રાખીને લેવામાં આવશે.
હાલમાં રશિયાએ સ્પષ્ટ કર્યું છે કે તેને ભારતની નીતિમાં કોઈ ફેરફાર જોવા મળ્યો નથી અને બંને દેશો વચ્ચેનો ઉર્જા વેપાર પહેલાની જેમ જ ચાલુ છે.
આ પણ વાંચો- સિરાજની જર્સી પહેરીને બેટિંગ કરવા આવ્યો અભિષેક શર્મા, હજુ ખાતું નહોતું ખોલ્યું, શરમજનક રેકોર્ડમાં એન્ટ્રી
