ભારતીય ક્રિકેટ ટીમે T20 વર્લ્ડ કપમાં પોતાની પ્રથમ મેચમાં અમેરિકાને 29 રને હરાવ્યું હતું. આ જીત સાથે ભારત T20 વર્લ્ડ કપના ગ્રુપ Aમાં પ્રથમ સ્થાને પહોંચી ગયું છે. મુંબઈના વાનખેડે સ્ટેડિયમમાં રમાયેલી મેચમાં ભારતીય બેટ્સમેનોનું પ્રદર્શન નિરાશાજનક રહ્યું હતું. અમેરિકા સામેની મેચમાં ભારતીય દાવ દરમિયાન માત્ર ચાર બેટ્સમેન જ ડબલ ફિગર પાર કરી શક્યા હતા. ટીમે નિયમિત અંતરે વિકેટ ગુમાવી છે. પ્રથમ બેટિંગ કરતા ભારતે 20 ઓવરમાં 9 વિકેટ ગુમાવીને 161 રન બનાવ્યા હતા. જેના જવાબમાં અમેરિકાની ટીમે શાનદાર પ્રદર્શન કર્યું હતું અને વર્લ્ડ કપ જીતવાની પ્રબળ દાવેદાર ટીમ સામે 20 ઓવરમાં 8 વિકેટ ગુમાવીને 132 રન બનાવ્યા હતા.
162 રનના ટાર્ગેટનો પીછો કરતા અમેરિકાની શરૂઆત ખૂબ જ ખરાબ રહી હતી અને 13 રનના સ્કોર પર તેની ત્રણ વિકેટ પડી ગઈ હતી. એન્ડ્રેસ ગૉસ (છ)ને મોહમ્મદ સિરાજે આઉટ કર્યો હતો. આ પછી બીજી જ ઓવરમાં અર્શદીપ સિંહે કેપ્ટન મોનાંક પટેલ (0)ને આઉટ કરીને પેવેલિયન મોકલી દીધો હતો. ચોથી ઓવરમાં સિરાજે સાઈ તેજા એમ (બે)ને આઉટ કર્યો. આ પછી મિલિંદ કુમાર અને સંજય કૃષ્ણમૂર્તિની જોડીએ ચોથી વિકેટ માટે 58 રન જોડ્યા હતા.
વરુણ ચક્રવર્તીએ 12મી ઓવરમાં મિલિંદ કુમારને આઉટ કરીને આ ભાગીદારીને તોડી હતી. મિલિંદ કુમારે 34 બોલમાં ત્રણ ચોગ્ગા અને એક છગ્ગાની મદદથી 34 રન બનાવ્યા હતા. અક્ષર પટેલે 16મી ઓવરમાં સંજય કૃષ્ણમૂર્તિને આઉટ કર્યો હતો. સંજય કૃષ્ણમૂર્તિએ 31 બોલમાં એક ચોગ્ગો અને બે છગ્ગા સાથે 37 રનની ઇનિંગ રમી હતી. એ જ ઓવરના બીજા જ બોલ પર અક્ષરે હરમિત સિંહ (0)ને આઉટ કરીને પેવેલિયન મોકલી દીધો.
18મી ઓવરમાં અર્શદીપ સિંહે મોહમ્મદ મોહસિન (આઠ)ને આઉટ કરીને ભારતને સાતમી સફળતા અપાવી હતી. મોહમ્મદ સિરાજે મેચના છેલ્લા બોલ પર શુભમ રાંજને (37)ને આઉટ કર્યો હતો. અમેરિકન ટીમ નિર્ધારિત 20 ઓવરમાં આઠ વિકેટે 132 રન જ બનાવી શકી અને 29 રનથી મેચ હારી ગઈ. ભારત તરફથી મોહમ્મદ સિરાજ, અર્શદીપ સિંહ અને અક્ષર પટેલે બે-બે વિકેટ લીધી હતી. વરુણ ચક્રવર્તીએ એક બેટ્સમેનને આઉટ કર્યો હતો.
આજે શરૂઆતમાં અમેરિકાએ ટોસ જીતીને પ્રથમ બોલિંગ કરવાનો નિર્ણય કર્યો હતો. બેટિંગ કરવા આવેલી ભારતીય ટીમની શરૂઆત સારી રહી ન હતી અને તેણે અભિષેક શર્મા (0)ની વિકેટ ગુમાવી હતી. આ પછી તિલક વર્મા અને ઇશાન કિશને ઇનિંગ સંભાળી હતી. બંને બેટ્સમેન વચ્ચે 37 રનની ભાગીદારી નોંધાઈ હતી. શેડલી વેન શાલ્કવીકે છઠ્ઠી ઓવરમાં ત્રણ વિકેટ લઈને ભારતને બેકફૂટ પર લાવી દીધું હતું.
