અમેરિકી રાષ્ટ્રપતિ ડોનાલ્ડ ટ્રમ્પે જાહેરાત કરી છે કે છેલ્લા 50 વર્ષમાં અમેરિકામાં પ્રથમ નવી ઓઈલ રિફાઈનરી ખોલવા જઈ રહી છે. તેમણે દાવો કર્યો હતો કે આ ઐતિહાસિક પ્રોજેક્ટમાં ભારતની દિગ્ગજ કંપની રિલાયન્સ ઇન્ડસ્ટ્રીઝ લિમિટેડની પણ મોટી ભૂમિકા છે. મંગળવારે તેમના સોશિયલ મીડિયા પ્લેટફોર્મ ‘ટ્રુથ સોશિયલ’ પર આ માહિતી આપતા ટ્રમ્પે લખ્યું – મને એ જાહેરાત કરતા ગર્વ થઈ રહ્યો છે કે ‘અમેરિકા ફર્સ્ટ રિફાઈનિંગ’ 50 વર્ષમાં પ્રથમ નવી અમેરિકન ઓઈલ રિફાઈનરી, બ્રાઉન્સવિલે, ટેક્સાસમાં ખોલવા જઈ રહી છે.
વ્હાઈટ હાઉસ ઈરાનમાં ચાલી રહેલા યુદ્ધને કારણે વધતી જતી ઉર્જાની કિંમતોને લઈને વૈશ્વિક ચિંતાઓને શાંત કરવા માંગે છે ત્યારે આ જાહેરાત કરવામાં આવી છે. ટ્રમ્પ વહીવટીતંત્ર તેલ અને ગેસોલિનના ભાવ ઘટાડવા માટે ઘણા વિકલ્પો પર વિચાર કરી રહ્યું છે. આમાં કટોકટી ભંડારમાંથી તેલ છોડવું અને હોર્મુઝ સ્ટ્રેટમાંથી પસાર થતા ટેન્કરોને લશ્કરી સુરક્ષા પૂરી પાડવાનો સમાવેશ થાય છે.
રિલાયન્સ સાથે 20 વર્ષનો કરાર
સોશિયલ મીડિયા પ્લેટફોર્મ ‘ટ્રુથ સોશિયલ’ પર એક પોસ્ટમાં ટ્રમ્પે કહ્યું કે આ નવી રિફાઈનરી અમેરિકન બજારોની ઈંધણની જરૂરિયાતોને પૂરી કરશે, ઊર્જા ઉત્પાદનને વેગ આપશે અને રાષ્ટ્રીય સુરક્ષાને મજબૂત કરશે. તેણે લખ્યું- ‘અમેરિકા વાસ્તવિક ઉર્જા પ્રભુત્વ તરફ પરત ફરી રહ્યું છે! આજે મને એ જાહેરાત કરતાં ગર્વ થાય છે કે અમેરિકા ફર્સ્ટ રિફાઇનિંગ 50 વર્ષમાં પ્રથમ નવી યુએસ ઓઇલ રિફાઇનરી બ્રાઉન્સવિલે, ટેક્સાસમાં ખોલી રહી છે. આ $300 બિલિયનનો ઐતિહાસિક સોદો છે, જે યુએસ ઈતિહાસનો સૌથી મોટો સોદો છે. અમેરિકન કામદારો, ઊર્જા અને દક્ષિણ ટેક્સાસના મહાન લોકો માટે આ એક મોટી જીત છે! આ જબરદસ્ત રોકાણ માટે ભારતમાં અમારા ભાગીદારો અને તેમની સૌથી મોટી ખાનગી ઊર્જા કંપની રિલાયન્સનો આભાર. અમારા અમેરિકા ફર્સ્ટ એજન્ડા, પરમિટને સરળ બનાવવા અને ટેક્સ ઘટાડવાના કારણે જ અબજો ડોલરના સોદા આપણા દેશમાં પાછા આવી રહ્યા છે. બ્રાઉન્સવિલે બંદર પર નવી રિફાઇનરી યુએસ બજારોને વેગ આપશે, આપણી રાષ્ટ્રીય સુરક્ષાને મજબૂત કરશે, યુએસ ઊર્જા ઉત્પાદનને વેગ આપશે, અબજો ડોલરની આર્થિક અસર ચલાવશે અને વિશ્વની સૌથી સ્વચ્છ રિફાઇનરી બનશે. તે વૈશ્વિક નિકાસને વેગ આપશે અને તેના લાયક પ્રદેશમાં હજારો નોકરીઓ અને વૃદ્ધિ લાવશે. અમેરિકન ઉર્જા પ્રભુત્વ આના જેવું દેખાય છે. અમેરિકા પ્રથમ, હંમેશા!’
અમેરિકા ફર્સ્ટ રિફાઇનિંગના એક નિવેદન અનુસાર, કંપની આ વર્ષના બીજા ત્રિમાસિક ગાળામાં આ નવી રિફાઇનરીનું બાંધકામ શરૂ કરવાની યોજના ધરાવે છે. કંપનીએ તેના દ્વારા ઉત્પાદિત ઇંધણને વેચવા માટે 20-વર્ષના કરાર પર હસ્તાક્ષર કર્યા છે અને આ મોટો વેચાણ સોદો ભારતની રિલાયન્સ સાથે કરવામાં આવ્યો છે. આ મામલે રિલાયન્સ તરફથી હજુ સુધી કોઈ ટિપ્પણી કરવામાં આવી નથી.
