ગુરુવારે એડિલેડ ઓવલમાં ઓસ્ટ્રેલિયા સામે રમાયેલી બીજી વનડે મેચમાં ભારતીય ક્રિકેટ ટીમને 2 વિકેટથી હારનો સામનો કરવો પડ્યો હતો. આ હાર સાથે ભારતે માત્ર 0-2થી ODI શ્રેણી ગુમાવી એટલું જ નહીં, પરંતુ આ ઐતિહાસિક મેદાન પર તેના 17 વર્ષના ભવ્ય વિજય અભિયાનનો પણ અંત કર્યો. ભારતના 265 રનના લક્ષ્યાંકનો પીછો કરતા ઓસ્ટ્રેલિયાએ શોર્ટ અને કોનોલીની અડધી સદીની મદદથી 46.2 ઓવરમાં આઠ વિકેટે 265 રન બનાવીને જીત મેળવી હતી. ભારતીય ફિલ્ડરોએ 78 બોલમાં 74 રનની શાનદાર ઇનિંગ રમનાર મેથ્યુ શોર્ટ સહિત ઓછામાં ઓછી ત્રણ તક ગુમાવી હતી. ભારત અને ઓસ્ટ્રેલિયા વચ્ચે ત્રીજી વનડે શનિવારે સિડનીમાં રમાશે.
એડિલેડ ઓવલ મેદાન ભારતીય ટીમ માટે છેલ્લા દોઢ દાયકાથી અભેદ્ય કિલ્લો બની ગયું હતું. ગત વખતે ભારતીય ટીમને આ મેદાન પર ઓસ્ટ્રેલિયાએ હરાવ્યું હતું. 2008માં ત્રિકોણીય શ્રેણી દરમિયાન ભારતને આ મેદાન પર ODI મેચમાં હારનો સામનો કરવો પડ્યો હતો. આ પછી, ભારતીય ટીમે એડિલેડમાં સતત પાંચ ODI મેચો (એક ટાઈ સહિત) જીતી હતી, જેમાં 2015 વર્લ્ડ કપમાં પાકિસ્તાન સામે અને 2019માં ઓસ્ટ્રેલિયા સામેની ઐતિહાસિક જીતનો સમાવેશ થાય છે. કેપ્ટન શુભમન ગિલની આગેવાની હેઠળની ટીમ આ ભવ્ય રેકોર્ડને લંબાવવામાં નિષ્ફળ રહી હતી.
આ હાર સાથે યુવા કેપ્ટન શુભમન ગિલના નામે એક અનિચ્છનીય રેકોર્ડ પણ જોડાઈ ગયો. તે અજીત વાડેકર, દિલીપ વેંગસરકર, ક્રિશ શ્રીકાંત, મોહમ્મદ અઝહરુદ્દીન અને કેએલ રાહુલ પછી છઠ્ઠો ભારતીય કેપ્ટન બન્યો છે જે તેની કપ્તાની હેઠળ પ્રથમ બે વનડે મેચ હારી ગયો છે.
અગાઉ, ભારતે રોહિત (73 રન, 97 બોલ, સાત ચોગ્ગા, બે છગ્ગા) અને શ્રેયસ અય્યર (61 રન, 77 બોલ, સાત ચોગ્ગા)ની અડધી સદીની મદદથી નવ વિકેટે 264 રન બનાવ્યા હતા અને બંને વચ્ચે ત્રીજી વિકેટ માટે 118 રનની ભાગીદારી નોંધાઈ હતી.
