ICC મહિલા ક્રિકેટ વર્લ્ડ કપ 2025 ની ફાઇનલ મેચ નવી મુંબઈમાં 2 નવેમ્બર, રવિવારના રોજ ભારત અને દક્ષિણ આફ્રિકા વચ્ચે રમાવાની છે. આ મેચમાં બંને ટીમોની નજર પોતાના પ્રથમ ટાઈટલ પર રહેશે. ભારત ટ્રોફી ઉપાડવા માટે ખૂબ જ ઉત્સુક હશે કારણ કે 2005 અને 2017 પછી આ તેની ત્રીજી વર્લ્ડ કપ ફાઇનલ છે. તે જ સમયે, દક્ષિણ આફ્રિકાની મહિલા ટીમ પ્રથમ વખત ODI વર્લ્ડ કપની ફાઇનલમાં પહોંચવામાં સફળ રહી છે. ભારતે નિરાશ થવાની જરૂર નથી કારણ કે ઇંગ્લેન્ડ અને ન્યુઝીલેન્ડે મહિલા વનડે વર્લ્ડ કપ ફાઇનલમાં તેમના ત્રીજા પ્રયાસમાં ટાઇટલનો દુષ્કાળ સમાપ્ત કર્યો હતો અને ભારતીય મહિલા ટીમ પણ આવી જ સ્થિતિમાં છે.
વર્ષ 2005માં દક્ષિણ આફ્રિકામાં રમાયેલી વર્લ્ડ કપ ફાઇનલમાં ઓસ્ટ્રેલિયાએ ભારતને 98 રને હરાવ્યું હતું, જ્યારે 2017માં ઘરઆંગણે રમાયેલી રોમાંચક ફાઇનલમાં ઇંગ્લેન્ડે ભારત સામે નવ રને વિજય નોંધાવ્યો હતો.
મહિલા વિશ્વ કપની પ્રથમ બે ઈવેન્ટમાં લીગ સ્ટેજના પોઈન્ટના આધારે વિજેતા નક્કી કરવામાં આવ્યા હતા. જેમાં ઇંગ્લેન્ડ 1973માં અને ઓસ્ટ્રેલિયા 1978માં ચેમ્પિયન બન્યું હતું.
વર્લ્ડ કપમાં ફાઈનલ મેચની પરંપરા 1982માં શરૂ થઈ હતી.ઈંગ્લેન્ડને 1982 અને 1988માં ફાઈનલમાં ઓસ્ટ્રેલિયા સામે હારનો સામનો કરવો પડ્યો હતો પરંતુ ટીમે 1993માં ન્યૂઝીલેન્ડને હરાવીને પ્રથમ વખત વર્લ્ડ કપની ફાઈનલ જીતી હતી.
