દુબઈ એરપોર્ટ પર હુમલોઃ અમેરિકા, ઈઝરાયેલ અને ઈરાન વચ્ચે ચાલી રહેલા યુદ્ધ વચ્ચે ઈરાને UAE પર મોટો હુમલો કર્યો છે. મળતી માહિતી મુજબ, ઈરાને બુધવારે UAE પર ભારે મિસાઈલ અને ડ્રોન છોડ્યા હતા. અહેવાલો અનુસાર, ઈરાને દુબઈ એરપોર્ટને પણ નિશાન બનાવ્યું છે, જ્યાં ડ્રોન પડતાં એક ભારતીય સહિત ચાર લોકો ઘાયલ થયા છે.
દુબઈ મીડિયા ઓફિસે જણાવ્યું કે હુમલામાં ભારતીય નાગરિકને થોડી ઈજાઓ થઈ છે. દુબઈ ઈન્ટરનેશનલ એરપોર્ટ નજીક થયેલા હુમલામાં ભારતીય નાગરિક ઉપરાંત ઘાનાના બે નાગરિકો અને એક બાંગ્લાદેશી નાગરિક પણ ઘાયલ થયા હતા. દુબઈ મીડિયા ઓફિસે X પર એક નિવેદનમાં જણાવ્યું હતું કે, “ઓથોરિટીઓએ પુષ્ટિ કરી છે કે થોડા સમય પહેલા દુબઈ ઈન્ટરનેશનલ એરપોર્ટ (DXB) પાસે બે ડ્રોન પડ્યા હતા, જેના કારણે બે ઘાનાના નાગરિકો, એક બાંગ્લાદેશી નાગરિક અને એક ભારતીય નાગરિકને નાની ઈજાઓ થઈ હતી. એર ટ્રાફિક સામાન્ય રીતે ચાલી રહ્યો છે.” અધિકારીઓ ઘટનાના કારણ અને ડ્રોનના સ્ત્રોતની તપાસ કરી રહ્યા છે. હુમલા બાદ પણ ફ્લાઇટ ઓપરેશન ચાલુ છે. તમને જણાવી દઈએ કે દુબઈ ઈન્ટરનેશનલ એરપોર્ટ એ ઈન્ટરનેશનલ ટ્રાવેલ માટે દુનિયાનું સૌથી વ્યસ્ત હબ છે.
યુએઈની એર ડિફેન્સ સિસ્ટમ સક્રિય છે
અગાઉ, સંયુક્ત આરબ અમીરાત (UAE) ના સંરક્ષણ મંત્રાલયે બુધવારે વહેલી સવારે કહ્યું હતું કે તેની હવાઈ સંરક્ષણ પ્રણાલી ઈરાન તરફથી આવતા મિસાઈલ અને ડ્રોન હુમલાનો સતત જવાબ આપી રહી છે. દુબઈમાં લોકોને સંભવિત મિસાઈલ ખતરા અંગે ચેતવણી આપતી સરકારી ઈમરજન્સી મોબાઈલ એલર્ટ મોકલવામાં આવી હતી અને તેમને તાત્કાલિક સુરક્ષિત ઈમારતોમાં ખસી જવા માટે કહેવામાં આવ્યું હતું. જોકે, બાદમાં સ્થિતિ સુધરતાં અધિકારીઓએ ચેતવણી પાછી ખેંચી લીધી હતી.
UAE સંરક્ષણ મંત્રાલયે મંગળવારે જણાવ્યું હતું કે તેની હવાઈ સંરક્ષણ પ્રણાલી સતર્ક છે અને સાથીઓ સાથે સંકલન કરીને તેને વધુ મજબૂત કરવામાં આવી છે. મંત્રાલયે કહ્યું કે છેલ્લા 11 દિવસમાં 1,475 ડ્રોન અને 270 મિસાઈલ હુમલા થયા છે, જેમાંથી મોટા ભાગનાને નિષ્ક્રિય કરવામાં આવ્યા છે.
