કેટલાક મહિનાઓથી વિરોધ પ્રદર્શનથી પરેશાન ઈરાનને ફરી એકવાર આંચકો લાગ્યો છે. દક્ષિણ ઈરાનના તટીય શહેર બંદર અબ્બાસમાં શનિવારે જોરદાર વિસ્ફોટ થયો હતો. સ્થાનિક મીડિયા અનુસાર વિસ્ફોટ ગેસ લીકેજને કારણે થયો હતો. આ સિવાય ઈરાક બોર્ડર પાસે સ્થિત અહવાઝ શહેરમાં ગેસ લીકેજને કારણે વિસ્ફોટ થયો હતો. બંને વિસ્ફોટોમાં કુલ પાંચ લોકોના મોત થયા છે, જ્યારે 14થી વધુ લોકો ઘાયલ થયા છે. કેટલાક અહેવાલોમાં સાત બ્લાસ્ટ થયા હોવાનું બહાર આવ્યું છે. તેમના જણાવ્યા અનુસાર, રાજધાની તેહરાન, બંદર અબ્બાસ, તાબ્રિઝ, કોમ, અહવાઝ, નંતજ અને પરંદમાં વિસ્ફોટ થયા હતા. ઈરાન સરકાર દ્વારા આની પુષ્ટિ કરવામાં આવી નથી.
ઈરાનના ફાયર વિભાગના વડા મોહમ્મદ અમીન લિયાકતએ બંદર અબ્બાસમાં વિસ્ફોટ અંગે ઈરાનની મીડિયા એજન્સી મેહરને આપેલા નિવેદનમાં જણાવ્યું હતું કે, “પ્રારંભિક તપાસ મુજબ જાણવા મળ્યું છે કે આ વિસ્ફોટ ગેસના કારણે થયો હતો. મારા સાથીદારો આગામી થોડા કલાકોમાં વધુ માહિતી આપશે.”
આ ઘટનાના ઘણા વીડિયો સોશિયલ મીડિયા પર શેર થઈ રહ્યા છે. આમાં, તૂટેલા વાહનો કાટમાળમાં ફેરવાયેલી ઇમારતોની આગળ પાર્ક કરેલા જોવા મળે છે, જે ઇમારતના કાટમાળને કારણે નુકસાન થયું છે. રોઇટર્સે ઇમારતો, વૃક્ષો અને રસ્તાના લેઆઉટનું વિશ્લેષણ કરીને સ્થાનની પુષ્ટિ કરી, જે સેટેલાઇટ અને ફાઇલ છબી સાથે મેળ ખાતી હતી. જો કે, આ વીડિયો કઈ તારીખનો છે તેની સ્વતંત્ર રીતે ચકાસણી થઈ શકતી નથી.
ઈરાનમાં બ્લાસ્ટના સમાચાર બહાર આવ્યા બાદ સૌથી મોટી શંકા અમેરિકા અને ઈઝરાયલ તરફ ગઈ. જો કે, સીએનએનના અહેવાલ મુજબ, અમેરિકન અને ઇઝરાયેલના અધિકારીઓએ સ્પષ્ટ કર્યું છે કે આ વિસ્ફોટોમાં તેમનો કોઈ હાથ નથી.
