ઈરાનમાં ચાલી રહેલા દેશવ્યાપી પ્રદર્શનો વચ્ચે ખામેની શાસને વિરોધીઓને ફાંસી આપવાનો નિર્ણય લીધો છે. ટ્રમ્પની ધમકીઓને અવગણીને, ઈરાનના ન્યાયતંત્રે રાષ્ટ્રવ્યાપી વિરોધમાં અટકાયતમાં લેવાયેલા લોકો માટે વહેલી સુનાવણી અને ફાંસીની સજાનો સંકેત આપ્યો છે. આ પહેલા ટ્રમ્પે ચેતવણી આપી છે કે જો ઈરાન આવું કોઈ પગલું ભરશે તો અમેરિકા કડક કાર્યવાહી કરી શકે છે.
ઈરાનના ન્યાયતંત્રના વડા, ગુલામ હુસૈન મોહસેની-અજેઈએ પોતે પુષ્ટિ કરી છે કે ઈરાન શક્ય તેટલી વહેલી તકે વિરોધીઓ વિરુદ્ધ કાર્યવાહી કરશે. “જો અમારે કંઈક કરવું હોય, તો અમારે તે હમણાં જ કરવું જોઈએ. જો તેમાં વિલંબ થાય, તો બે મહિના, ત્રણ મહિના પછી, તેની સમાન અસર નહીં થાય. જો આપણે કંઈક કરવું હોય, તો અમારે તે ઝડપથી કરવું પડશે,” તેમણે એક નિવેદનમાં જણાવ્યું હતું. તેમના નિવેદનને ટ્રમ્પ માટે સીધા પડકાર તરીકે જોવામાં આવી રહ્યું છે.
ટ્રમ્પની ચેતવણી
ટ્રમ્પે ચેતવણી આપી છે કે જો શાંતિપૂર્ણ દેખાવકારોને મારવામાં આવશે તો અમેરિકા સૈન્ય કાર્યવાહી કરી શકે છે. ટ્રમ્પે મંગળવારે સીબીએસ સાથેની મુલાકાતમાં જણાવ્યું હતું કે, “અમે ખૂબ જ કડક પગલાં લઈશું. જો તેઓ આવું કંઈ કરશે તો અમે સખત પગલાં લઈશું.”
ઈરફાન સુલતાનીને જાહેરમાં મોતની સજા સંભળાવી
આ પહેલા બુધવારે વિરોધ પ્રદર્શનના સંબંધમાં સામૂહિક ધરપકડ બાદ ઈરાન જાહેરમાં 26 વર્ષીય ઈરફાન સુલતાનીને મોતની સજા સંભળાવી શકે છે. મળતી માહિતી અનુસાર, ઈરફાનની 8 જાન્યુઆરીએ તેહરાન નજીક કારજમાં સુપ્રીમ લીડર અયાતુલ્લા અલી ખમેની વિરુદ્ધ દેશવ્યાપી વિરોધ પ્રદર્શનમાં ભાગ લેવા બદલ ધરપકડ કરવામાં આવી હતી. નોર્વે સ્થિત એનજીઓ ઈરાન હ્યુમન રાઈટ્સે જણાવ્યું હતું કે તેના પરિવારને જાણ કરવામાં આવી હતી કે તેને મૃત્યુદંડની સજા સંભળાવવામાં આવી છે અને સજા 14 જાન્યુઆરીએ ચલાવવામાં આવશે.
