ન્યૂઝીલેન્ડ ક્રિકેટ ટીમના સ્ટાર લેગ સ્પિનર ઈશ સોઢીએ રવિવારે વેસ્ટ ઈન્ડિઝ સામેની મેચ દરમિયાન એક મોટી સિદ્ધિ હાંસલ કરી હતી. તે T20 ઈન્ટરનેશનલમાં સૌથી વધુ વિકેટ લેનારો ત્રીજો બોલર બની ગયો છે. તેણે બાંગ્લાદેશના ફાસ્ટ બોલર મુસ્તાફિઝુર રહેમાનનો રેકોર્ડ તોડ્યો. વેસ્ટ ઈન્ડિઝ સામેની ત્રીજી મેચમાં ઈશ સોઢીએ શાનદાર બોલિંગ કરીને ત્રણ વિકેટ ઝડપી હતી. જેના કારણે ન્યૂઝીલેન્ડે વેસ્ટ ઈન્ડિઝને 9 રને હરાવ્યું હતું. સોઢીને તેના શાનદાર પ્રદર્શન માટે પ્લેયર ઓફ ધ મેચ પણ જાહેર કરવામાં આવ્યો હતો. સોઢી ન્યુઝીલેન્ડ માટે સૌથી વધુ T20 આંતરરાષ્ટ્રીય મેચ રમનાર પુરૂષ ખેલાડી છે.
ત્રીજી ટી20 પહેલા સોઢીના નામે કુલ 153 વિકેટ હતી. તેણે ત્રણ વિકેટ લઈને તેની વિકેટની સંખ્યા 156 સુધી પહોંચાડી દીધી. આ સાથે તેણે મુસ્તાફિઝુર રહેમાનને પણ આ યાદીમાં પાછળ છોડી દીધો છે. રહેમાને 155 વિકેટ લીધી છે. રાશિદ ખાને ઈન્ટરનેશનલ ટી20 ક્રિકેટ (પુરુષો)માં પોતાનું વર્ચસ્વ જારી રાખ્યું છે. તે આ ફોર્મેટમાં 182 વિકેટ સાથે સૌથી વધુ વિકેટ લેનાર બોલર છે.
આ યાદીમાં બીજા સ્થાને ન્યુઝીલેન્ડનો અનુભવી ઝડપી બોલર ટિમ સાઉથી છે. ટિમ સાઉથીએ 156 વિકેટ લીધી છે. બાંગ્લાદેશનો શાકિબ અલ હસન 149 વિકેટ સાથે પાંચમા સ્થાને છે. મેચની વાત કરીએ તો ન્યૂઝીલેન્ડે ટોસ જીતીને પ્રથમ બેટિંગ કરીને નવ વિકેટે 177 રન બનાવ્યા હતા. તે પછી, લક્ષ્યનો પીછો કરતી વખતે વેસ્ટ ઈન્ડિઝે 13મી ઓવરમાં 88 રનમાં આઠ વિકેટ ગુમાવી દીધી હતી, જેના કારણે એવું લાગી રહ્યું હતું કે ન્યૂઝીલેન્ડ સરળતાથી જીતી જશે.
પરંતુ રોમારિયો શેફર્ડે 34 બોલમાં 49 રન અને શમર સ્પ્રિંગરે 20 બોલમાં 39 રન ફટકાર્યા હતા. જેના કારણે છેલ્લી ઓવરમાં વેસ્ટ ઈન્ડિઝને જીતવા માટે 14 રનની જરૂર હતી. શેફર્ડ અને અકેલ હોસીન ક્રિઝ પર હતા. છેલ્લી ઓવરની બોલિંગની જવાબદારી ફરીથી ઊંચા ઝડપી બોલર જેમિસનને આપવામાં આવી હતી. તેણે સંયમ સાથે બોલિંગ કરી, પ્રથમ ચાર બોલમાં માત્ર બે રન આપ્યા અને પાંચમા બોલ પર શેફર્ડને આઉટ કરીને મેચનો અંત આણ્યો.
