એડિલેડમાં રમાયેલી બીજી વનડેમાં ઓસ્ટ્રેલિયાએ ભારતને ત્રણ વિકેટે હરાવ્યું હતું. ભારતીય ટીમે બીજી મેચમાં ઓસ્ટ્રેલિયાને થોડી ટક્કર આપી હતી પરંતુ ઓછા સ્કોરને કારણે ઓસ્ટ્રેલિયા મેચ જીતવામાં સફળ રહ્યું હતું. ભારતીય ટીમના પૂર્વ કેપ્ટન રોહિત શર્માએ બીજી મેચમાં જોરદાર ઇનિંગ રમી હતી. તેણે શ્રેયસ અય્યર સાથે સદીની ભાગીદારી પણ કરી હતી. જેના કારણે ભારત સન્માનજનક સ્કોર સુધી પહોંચવામાં સફળ રહ્યું હતું. સ્ટાર બેટ્સમેન વિરાટ કોહલી સતત બીજી મેચમાં શૂન્ય પર આઉટ થયો હતો, જેના કારણે તેની નિવૃત્તિની ચર્ચાઓ શરૂ થઈ હતી. મેચ બાદ ગૌતમ ગંભીરની એક કોમેન્ટ વાયરલ થઈ રહી છે, જેમાં તેણે રોહિતની નિવૃત્તિ અંગે મજાક ઉડાવી છે.
સોશિયલ મીડિયા પર વાયરલ થઈ રહેલા એક વીડિયોમાં મુખ્ય કોચ ગંભીર ટીમ હોટલમાં પરત ફરતી વખતે રોહિત શર્મા સાથે મજાક કરતા સંભળાય છે. ગંભીરે રોહિતને કહ્યું, “રોહિત, બધાને લાગી રહ્યું હતું કે આજે વિદાય મેચ હતી, ફોટો પોસ્ટ કરો!” હેડ કોચે આટલું કહ્યું કે તરત જ રોહિત હસવા લાગ્યો. તેની સાથે આવેલો કેપ્ટન શુભમન ગિલ પણ હસતો જોવા મળ્યો હતો. તેમની વાતચીતનો વીડિયો વાયરલ થતાં ચાહકોનું ટેન્શન વધી ગયું છે.
હાલમાં જ રોહિત શર્માને કેપ્ટન પદેથી હટાવીને શુભમન ગિલને ટીમની જવાબદારી સોંપવામાં આવી હતી, જે બાદ સોશિયલ મીડિયા પર રોહિતના 2027 વર્લ્ડ કપમાં રમવા અને તેની ODI કરિયરના ભવિષ્ય વિશે સતત અટકળો ચાલી રહી છે. પર્થમાં પ્રથમ વનડેમાં ફ્લોપ રહ્યા બાદ એડિલેડમાં રોહિતની 73 રનની લડાયક ઇનિંગે ટીકાકારોને ચૂપ કરી દીધા હતા. આ પ્રદર્શને સાબિત કર્યું કે રોહિતમાં હજુ ઘણું ક્રિકેટ બાકી છે.
રોહિત શર્મા (73), શ્રેયસ ઐયર (61) અને અક્ષર પટેલ (44)ની શાનદાર ઇનિંગ્સની મદદથી ભારતે નિર્ધારિત 50 ઓવરમાં નવ વિકેટે 264 રનનો પડકારજનક સ્કોર બનાવ્યો હતો. જવાબમાં ઓસ્ટ્રેલિયાએ વારંવારના અંતરે વિકેટ ગુમાવી હોવા છતાં 46.2 ઓવરમાં આઠ વિકેટે 265 રન બનાવીને શ્રેણી જીતી લીધી હતી.
