જૈશ-એ-મોહમ્મદે લાલ કિલ્લા પાસે બલાસ્ટ કરાવ્યું હતું, યુએનએસસીમાં ખુલાસો…

સંયુક્ત રાષ્ટ્રના મંચ પર પાકિસ્તાન ફરી એકવાર શંકાના દાયરામાં આવ્યું છે. UN સુરક્ષા પરિષદના તાજેતરના અહેવાલમાં કહેવામાં આવ્યું છે કે ગયા વર્ષે 10 નવેમ્બરે દિલ્હીના લાલ કિલ્લા મેટ્રો સ્ટેશન પાસે થયેલા વિસ્ફોટ પાછળ આતંકવાદી સંગઠન જૈશ-એ-મોહમ્મદનો હાથ હતો. રિપોર્ટમાં સ્પષ્ટ લખ્યું છે કે જૈશે આ હુમલાની જવાબદારી લીધી છે.

સંયુક્ત રાષ્ટ્રની 1267 પ્રતિબંધ સમિતિના રિપોર્ટમાં જૈશને તાજેતરના કેટલાંક આતંકવાદી હુમલાઓ સાથે જોડવામાં આવ્યું છે. રિપોર્ટ અનુસાર, જૈશ ચીફ મસૂદ અઝહરે 8 ઓક્ટોબરે ‘જમાત-ઉલ-મોમિનાત’ સંગઠનની નવી મહિલા પાંખ બનાવવાની જાહેરાત કરી હતી. કહેવામાં આવ્યું છે કે આ શાખાનો હેતુ આતંકવાદી ગતિવિધિઓમાં મદદ અને સમર્થન એકત્ર કરવાનો છે.

રિપોર્ટમાં, એક સભ્ય દેશે પુષ્ટિ કરી છે કે લાલ કિલ્લા નજીક વિસ્ફોટ સહિત અનેક હુમલાઓની જવાબદારી જૈશે પોતે લીધી છે. અન્ય સભ્ય દેશે જૈશને “નિષ્ક્રિય સંગઠન” તરીકે વર્ણવ્યું. નિષ્ણાતો માને છે કે આવા વિરોધાભાસી નિવેદનો પાકિસ્તાનના બેવડા વલણને છતી કરે છે.

યુએનના રિપોર્ટમાં એ પણ નોંધવામાં આવ્યું છે કે 28 જુલાઈ 2025ના રોજ જમ્મુ અને કાશ્મીરના પહલગામમાં થયેલા આતંકવાદી હુમલામાં સામેલ ત્રણ શંકાસ્પદ આતંકવાદીઓ માર્યા ગયા હતા.

જો કે ‘ધ રેઝિસ્ટન્સ ફ્રન્ટ’, લશ્કર-એ-તૈયબા સાથે સંકળાયેલા સંગઠને એપ્રિલમાં પહેલગામમાં થયેલા હુમલાની જવાબદારી લીધી હતી, પરંતુ રિપોર્ટમાં જૈશ સાથેની લિંક પણ અલગથી રેખાંકિત કરવામાં આવી છે.

પહેલગામ હુમલા બાદ ભારતે કડક પગલાં લીધા હતા. મે મહિનામાં ભારતીય સેનાએ પાકિસ્તાનમાં આતંકવાદી ઠેકાણાઓ સામે સચોટ કાર્યવાહી કરી હતી. આ પછી ચાર દિવસ સુધી સરહદ પર તણાવપૂર્ણ સ્થિતિ રહી હતી. આ હુમલાઓમાં જૈશ અને લશ્કરના ઘણા ઠેકાણાઓને નષ્ટ કરવામાં આવ્યા હતા અને ઘણા મોટા આતંકવાદીઓ માર્યા ગયા હતા. ભારતે આ પગલાંને સ્વરક્ષણ ગણાવ્યું હતું અને વિશ્વને આતંકવાદ સામે એક થવાની અપીલ કરી હતી.

યુએનનો રિપોર્ટ એ પણ યાદ અપાવે છે કે જૈશ-એ-મોહમ્મદ અને લશ્કર-એ-તૈયબાને અલ-કાયદા સાથેના સંબંધોને કારણે 1990ના દાયકાથી યુએનની 1267 પ્રતિબંધોની યાદીમાં રાખવામાં આવ્યા છે. આ સંગઠનો પર શસ્ત્રોની ખરીદી અને વેચાણ, મુસાફરી અને ભંડોળ પર પ્રતિબંધ છે. જૈશ ચીફ મસૂદ અઝહરને પહેલા જ વૈશ્વિક આતંકવાદી જાહેર કરવામાં આવ્યો છે.