‘જામતારા સીઝન 2’ના એક્ટર સચિન ચંદવડેએ 25 વર્ષની ઉંમરે મહારાષ્ટ્રના જલગાંવમાં પોતાના ઘરે આત્મહત્યા કરી લીધી છે. જો કે તેના આ પગલા પાછળનું કારણ હજુ સુધી બહાર આવ્યું નથી.
મરાઠી સિનેમા અને ઓટીટી જગતના ઉભરતા સ્ટાર સચિન ચંદવડેના નિધનથી દરેકને આઘાત લાગ્યો છે. તેણે માત્ર 25 વર્ષની ઉંમરમાં આત્મહત્યા કરી લીધી. માહિતી અનુસાર, મહારાષ્ટ્રના જલગાંવ જિલ્લાના પરોલા તહસીલના ઉંદિરખેડ ગામના રહેવાસી સચિનનો મૃતદેહ તેના એપાર્ટમેન્ટમાંથી મળી આવ્યો હતો. જે બાદ આત્મહત્યાની પુષ્ટિ થઈ છે. તેમના મૃત્યુના સમાચારથી સમગ્ર મનોરંજન જગતને આઘાત લાગ્યો છે.
આશાસ્પદ કલાકારના આકસ્મિક નિધનથી ચાહકો અને તેના ઉદ્યોગના મિત્રો આઘાતમાં છે. સચિનના પરિવારજનોએ જણાવ્યું કે જ્યારે તેની તબિયત વધુ ખરાબ થઈ ત્યારે તેને ધુલે રિફર કરવામાં આવ્યો.
‘જામતારા સીઝન 2’ ફેમ એક્ટર સચિન ચંદવડેએ આત્મહત્યા કરી
તેનું સારવાર દરમિયાન જ મોત નિપજ્યું હતું. પરોલા પોલીસે ‘આકસ્મિક મૃત્યુ’નો કેસ નોંધ્યો છે, પરંતુ આત્મહત્યા પાછળનું કારણ હજુ સ્પષ્ટ થયું નથી. તપાસ ચાલુ છે અને પરિવારે હજુ સુધી કોઈ સત્તાવાર નિવેદન આપ્યું નથી.
સચિન ચાંદવડે મૂળભૂત રીતે સોફ્ટવેર એન્જિનિયર હતા. તેઓ પૂણેના એક મોટા આઈટી પાર્કમાં કામ કરતા હતા, પરંતુ બાળપણથી જ અભિનય પ્રત્યેના તેમના જુસ્સાએ તેમને ફિલ્મો તરફ આકર્ષ્યા હતા. આ શોખને કારણે તેને મુંબઈ અને પુણેની મરાઠી ફિલ્મ ઈન્ડસ્ટ્રીમાં સ્થાન મળ્યું. તેણે શોર્ટ ફિલ્મ ‘વિષય ક્લોઝ’માં કામ કર્યું હતું, જેને દર્શકોએ ખૂબ પસંદ કર્યું હતું.
નેચરલ પરફોર્મન્સે ઘણી પ્રશંસા મેળવી
Netflix ની લોકપ્રિય ક્રાઈમ થ્રિલર શ્રેણી ‘જામતારા: સીઝન 2’ માં તેની ભૂમિકા નાની હતી, પરંતુ તેના કુદરતી અભિનયને ઘણી પ્રશંસા મળી હતી. આ શ્રેણીમાં ફિશિંગ કૌભાંડોની દુનિયા બતાવવામાં આવી હતી અને તેમાં સચિનની ભૂમિકા યાદગાર રહી હતી. 19 ઓક્ટોબરે, તેમના મૃત્યુના માત્ર પાંચ દિવસ પહેલા, સચિને તેની આગામી મરાઠી ફિલ્મ ‘અસુરવન’નું મોશન પોસ્ટર ઇન્સ્ટાગ્રામ પર શેર કર્યું હતું.
અભિનેતા સોશિયલ મીડિયા પર બહુ એક્ટિવ નહોતો
તેણે લખ્યું હતું કે ફિલ્મ ટૂંક સમયમાં રિલીઝ થશે અને ચાહકોના સમર્થનની આશા વ્યક્ત કરી હતી. તે સોશિયલ મીડિયા પર બહુ એક્ટિવ નહોતો, પરંતુ તેણે જે પણ પોસ્ટ કર્યું તે કામ સાથે જોડાયેલું હતું. 23 સપ્ટેમ્બર, 2022 ના રોજ, તેણે ‘જામતારા 2’ ના સેટ પરથી એક ફોટો શેર કર્યો, જેમાં તેમનો ઉત્સાહ જોવા મળ્યો.
