બાંગ્લાદેશ સમાચાર: બાંગ્લાદેશમાં યુનુસની આગેવાની હેઠળની વચગાળાની સરકાર હિંદુઓ પર થતા અત્યાચારને રોકવામાં અને લઘુમતીઓને સુરક્ષા આપવામાં સંપૂર્ણપણે નિષ્ફળ ગઈ છે. દરમિયાન ફેબ્રુઆરીમાં યોજાનારી ચૂંટણી પહેલા દેશમાં વાતાવરણ વધુ સાંપ્રદાયિક બન્યું છે. હિંદુઓ વિરુદ્ધ હિંસાના સમાચાર સામાન્ય બની ગયા છે અને પગલાં લેવાને બદલે યુનુસ સરકાર આને અલગ-અલગ ઘટનાઓ ગણાવીને જવાબદારી લેવાનું ટાળવાનો પ્રયાસ કરી રહી છે. આ બધાની વચ્ચે હવે એક અહેવાલ સામે આવ્યો છે કે બાંગ્લાદેશી ઉમેદવારો ચૂંટણીમાં મત મેળવવા માટે જાણીજોઈને હિંદુઓ પર હુમલાને પ્રોત્સાહન આપી રહ્યા છે.
ન્યૂઝ 18 એ તેના એક અહેવાલમાં ગુપ્તચર સૂત્રોને ટાંકીને જણાવ્યું છે કે મત મેળવવા માટે હિંદુ લઘુમતીઓ વિરુદ્ધ હિંસા ભડકાવવા માટે સુનિયોજિત રણનીતિ બનાવવામાં આવી છે. રિપોર્ટ અનુસાર, બાંગ્લાદેશમાં ભૂતકાળમાં આ પ્રકારની સાંપ્રદાયિક આક્રમકતા કોઈ આકસ્મિક ઘટના નથી, પરંતુ આ ડર અને ચેતવણીના બળ પર વોટ મેળવવા માટે તૈયાર કરવામાં આવેલી યોજના છે.
ટોચના ગુપ્તચર સૂત્રોએ પાડોશી દેશમાં વર્તમાન પરિસ્થિતિ અંગે ગંભીર ચિંતા વ્યક્ત કરી છે. સૂત્રોએ જણાવ્યું કે કટ્ટરપંથી મૌલવીઓ અને સ્થાનિક નેતાઓ વચ્ચે સાંઠગાંઠ છે અને આ મૌલવીઓ અનેક પ્રસંગોએ નફરતભર્યા નિવેદનો આપતા અને લોકોને હિંદુ કે બિન-મુસ્લિમ ઉમેદવારોને મત ન આપવા અપીલ કરતા જોવા મળ્યા છે.
સાંસદ ઉમેદવારની કબૂલાત
રિપોર્ટમાં બાંગ્લાદેશના એક સાંસદ ઉમેદવારને પણ ટાંકવામાં આવ્યો છે. આ મુજબ, ઉમેદવારે કબૂલ્યું છે કે ઘણા વર્ષોથી દેશના રાજકારણીઓએ ચૂંટણી જીતવા માટે હિંદુ વિસ્તારો પર હુમલા કરવા અને હિંદુઓને મારી નાખવાની યુક્તિઓનો ઉપયોગ કર્યો છે. બાંગ્લાદેશીઓનું કહેવું છે કે આ હુમલા કરનારાઓને હવે ‘ઈસ્લામના સૈનિકો’ કહીને વખાણવામાં આવી રહ્યા છે.
