ઘણી અટકળો વચ્ચે ઉત્તર કોરિયાના નેતા કિમ જોંગ ઉન ફરી સત્તાધારી વર્કર્સ પાર્ટીના ટોચના પદ માટે ચૂંટાયા છે. છેલ્લા કેટલાક સમયથી ચર્ચા ચાલી રહી હતી કે કિમ જોંગ ઉન પોતાની પુત્રીને પાર્ટીની મોટી જવાબદારી આપી શકે છે. જોકે આવું થયું નથી. કિમ જોંગ ઉને ફરી એકવાર અમેરિકા પર આંખ આડા કાન કર્યા છે અને દેશમાં પરમાણુ હથિયારોને વધુ મજબૂત કરવાની જાહેરાત કરી છે. ગુરુવારથી શરૂ થયેલી પાર્ટી કોંગ્રેસમાં કિમ આગામી પાંચ વર્ષ માટે તેમના મુખ્ય રાજકીય અને લશ્કરી લક્ષ્યોની રૂપરેખા આપે તેવી અપેક્ષા છે. એવા સંકેતો છે કે તેઓ પરમાણુ કાર્યક્રમને વધુ વેગ આપવાનો આગ્રહ રાખશે. ઉત્તર કોરિયા પાસે પહેલેથી જ મિસાઇલો છે જે એશિયામાં યુએસના સહયોગી દેશો અને યુએસ મેઇનલેન્ડને પણ નિશાન બનાવી શકે છે.
દર પાંચ વર્ષે ચૂંટણી યોજાય છે
વિશ્લેષકો માને છે કે કિમ પરંપરાગત સૈન્ય દળોને મજબૂત કરવા અને તેમને પરમાણુ ક્ષમતાઓ સાથે એકીકૃત કરવાના નવા લક્ષ્યો જાહેર કરી શકે છે. આ સાથે જ તે ચીન સાથેના વેપારમાં સુધારા અને રશિયામાં શસ્ત્રોની નિકાસથી મળેલા આર્થિક પ્રોત્સાહનની વચ્ચે “આત્મનિર્ભરતા” અભિયાન પર પણ ફરી જોર આપી શકે છે. ઉત્તર કોરિયાની સત્તાવાર કોરિયન સેન્ટ્રલ ન્યૂઝ એજન્સી (KCNA) એ જણાવ્યું હતું કે કિમ હજારો પ્રતિનિધિઓની “સર્વસંમતિથી” પાર્ટીના જનરલ સેક્રેટરી તરીકે ચૂંટાયા હતા. 2016થી દર પાંચ વર્ષે યોજાતી આ કોંગ્રેસમાં ટોચના નેતાની પસંદગી કરવામાં આવે છે.
અમેરિકા અને દક્ષિણ કોરિયા વચ્ચે તણાવ
નિષ્ણાતોનો અંદાજ છે કે કિમ દક્ષિણ કોરિયા પ્રત્યેના તેના કડક વલણને વધુ સંસ્થાકીય બનાવી શકે છે. 2019 માં યુએસ પ્રમુખ ડોનાલ્ડ ટ્રમ્પ સાથેની વાતચીત નિષ્ફળ થયા બાદ ઉત્તર કોરિયાના યુએસ અને દક્ષિણ કોરિયા સાથે રાજદ્વારી સંદેશાવ્યવહાર અટકી ગયો છે. કિમે 2024 માં દક્ષિણ કોરિયાને કાયમી દુશ્મન જાહેર કરીને સંબંધોને વધુ વણસ્યા હતા.
રશિયાની નજીક
યુક્રેન યુદ્ધમાં કિમ જોંગ ઉન ખુલ્લેઆમ રશિયાનું સમર્થન કરી રહ્યા છે. તેઓએ રશિયા વતી હજારો સૈનિકોને યુદ્ધમાં પણ ઉતાર્યા છે. તેઓ રશિયાની મુલાકાત પણ લઈ ચૂક્યા છે. નિષ્ણાતોનું કહેવું છે કે રશિયા અને ઉત્તર કોરિયા મળીને પોતાની સેનાને મજબૂત કરવા અને પરમાણુ હથિયાર બનાવવા પર ભાર આપી રહ્યા છે.
