ભારતીય ટીમના સ્પિનર કુલદીપ યાદવે ભારતીય ક્રિકેટ કંટ્રોલ બોર્ડ એટલે કે BCCI પાસે થોડા દિવસની રજા માંગી છે. તેની પાછળનું કારણ પણ ઘણું ખાસ છે. કુલદીપ યાદવ હાલમાં કોલકાતાના ઈડન ગાર્ડન્સ ખાતે રમાઈ રહેલી દક્ષિણ આફ્રિકા સામેની પ્રથમ ટેસ્ટ મેચમાં રમી રહ્યો છે, પરંતુ તે આ શ્રેણીની બીજી ટેસ્ટ મેચ ચૂકી શકે છે. આ સિવાય આ સ્પિનર દક્ષિણ આફ્રિકા સામેની આ ટેસ્ટ શ્રેણી બાદ રમાનારી વનડે સિરીઝ પણ ચૂકી શકે છે, કારણ કે તે નવેમ્બરના અંતમાં લગ્ન કરવા જઈ રહ્યો છે.
જો અહેવાલોનું માનીએ તો, કુલદીપ યાદવના લગ્ન IPL પછી તરત જ થવાના હતા, જે મોકૂફ રાખવામાં આવ્યા હતા કારણ કે ભારત અને પાકિસ્તાન વચ્ચે સર્જાયેલી યુદ્ધ જેવી સ્થિતિને કારણે IPL પણ સ્થગિત કરવામાં આવી હતી. હવે કુલદીપ યાદવ નવેમ્બરના અંતિમ સપ્તાહમાં લગ્ન કરવાના છે. ટાઈમ્સ ઓફ ઈન્ડિયા અનુસાર, કુલદીપ તેના લગ્ન માટે રજા માટે બીસીસીઆઈની મંજૂરીની રાહ જોઈ રહ્યો છે. બોર્ડના સૂત્રોએ જણાવ્યું કે આ સ્પિનરે નવેમ્બરના છેલ્લા અઠવાડિયા માટે બોર્ડ પાસે રજા માંગી છે.
કુલદીપ ભારત વિરુદ્ધ દક્ષિણ આફ્રિકા શ્રેણી માટે ટેસ્ટ ટીમનો ભાગ છે અને પ્રથમ ટેસ્ટ મેચમાં પણ રમી રહ્યો છે. બીજી ટેસ્ટ મેચ 22 નવેમ્બરથી ગુવાહાટીમાં રમાશે. તે 30 નવેમ્બરથી શરૂ થનારી આ મેચ અને 3 મેચની વનડે સિરીઝ ચૂકી શકે છે. જો કે, તે 9 ડિસેમ્બરથી રમાનારી પાંચ મેચની T20 સિરીઝ માટે ઉપલબ્ધ હોઈ શકે છે. “કુલદીપના લગ્ન નવેમ્બરના અંતિમ સપ્તાહમાં થવાના છે. ટીમ મેનેજમેન્ટ તેને રજાઓની ચોક્કસ સંખ્યા આપતા પહેલા તેની સેવાઓની કેટલા સમયની જરૂર છે તેનું મૂલ્યાંકન કરશે,” બીસીસીઆઈના એક સૂત્રએ જણાવ્યું હતું.
કુલદીપ યાદવ ODI અને T20 સિરીઝ માટે ઓસ્ટ્રેલિયાના પ્રવાસે ગયો હતો. ODI શ્રેણીમાં એક મેચ અને T20 શ્રેણીમાં બે મેચ રમ્યા બાદ તેને ટીમમાંથી બહાર કરવામાં આવ્યો હતો. ભારત આવ્યા પછી, તે બેંગલુરુમાં દક્ષિણ આફ્રિકા A સામેની બીજી બિનસત્તાવાર ટેસ્ટ મેચમાં ભારત A માટે રમ્યો. હવે કોલકાતામાં ટેસ્ટ મેચ રમી રહ્યો છે. આ મેચ બાદ તેને મુક્ત કરવામાં આવી શકે છે.
