મધ્ય પૂર્વમાં અમેરિકા અને ઈરાન વચ્ચેના તણાવ બાદ હવે તણાવ ચરમસીમાએ પહોંચતો જોવા મળી રહ્યો છે. સમાચાર છે કે ઈરાન અને રશિયા અહીં ઓમાન સમુદ્ર અને ઉત્તર હિંદ મહાસાગરમાં સંયુક્ત કવાયત કરવા જઈ રહ્યા છે. બંને દેશોના આ પગલાથી અમેરિકી રાષ્ટ્રપતિ ડોનાલ્ડ ટ્રમ્પની ચિંતામાં વધારો થશે. આ એટલા માટે પણ મહત્વપૂર્ણ છે કારણ કે ઈરાનને ચેતવણી આપવા માટે અમેરિકા આ વિસ્તારમાં 2 યુદ્ધ જહાજ મોકલી ચૂક્યું છે. મંગળવારે અમેરિકાએ માત્ર 24 કલાકમાં 50થી વધુ ફાઈટર જેટ મોકલ્યા.
ઈરાન અને રશિયા ગુરુવારે ઓમાન સમુદ્ર અને ઉત્તર હિંદ મહાસાગરમાં નૌકાદળની કવાયત કરશે, ઈરાનની અર્ધ-સત્તાવાર ફાર્સ ન્યૂઝ એજન્સીએ અહેવાલ આપ્યો છે. તાજેતરમાં, ઈરાની રિવોલ્યુશનરી ગાર્ડ્સે પણ સ્ટ્રેટ ઓફ હોર્મુઝમાં લશ્કરી કવાયત હાથ ધરી છે.
રિપોર્ટ અનુસાર ઈરાની નેવી કમાન્ડર હસન મગસુદલૂએ કહ્યું છે કે તેનો હેતુ બંને દેશો વચ્ચે તાલમેલ વધારવાનો છે. “તેનો હેતુ દરિયાઈ સુરક્ષા માટે ખતરો ઉભી કરતી પ્રવૃત્તિઓનો સામનો કરવા માટે સુમેળ બનાવવાનો છે. ઉપરાંત, દરિયાઈ આતંકવાદનો સામનો કરવો એ આ સંયુક્ત કવાયતનો મુખ્ય ઉદ્દેશ્ય છે,” તેમણે કહ્યું.
ઉલ્લેખનીય છે કે ઈરાન અને રશિયાની આ કવાયત એવા સમયે થઈ રહી છે જ્યારે અમેરિકન યુદ્ધ જહાજો અહીં પહેલાથી જ તૈનાત છે. અમેરિકા મધ્ય પૂર્વમાં પોતાની સૈન્ય હાજરી વધારી રહ્યું છે. 24 કલાકની અંદર અમેરિકાએ ઈરાન તરફ 50 થી વધુ ફાઈટર જેટ તૈનાત કર્યા છે. અહેવાલોમાં એવું પણ સામે આવ્યું છે કે આ વિમાન કોઈ મોટા ઓપરેશનની તૈયારી કરી રહ્યા છે.
