પશ્ચિમ એશિયામાં યુદ્ધવિરામ પર સંકટના વાદળો છવાઈ રહ્યા છે. ઈરાન દ્વારા ઈઝરાયેલને ધમકી આપવામાં આવી હોવાના સમાચાર છે. લેબનોનમાં હુમલાના જવાબમાં તેલ અવીવને ઉડાવી દેવાની ધમકીઓ આપવામાં આવી છે. ખાસ વાત એ છે કે મધ્યસ્થી પાકિસ્તાને કહ્યું હતું કે યુદ્ધવિરામમાં લેબનોનમાં શાંતિ પણ સામેલ છે. જ્યારે, અમેરિકી રાષ્ટ્રપતિ ડોનાલ્ડ ટ્રમ્પ અને ઈઝરાયેલના વડાપ્રધાન બેન્જામિન નેતન્યાહુએ જાહેરમાં આ વાતનો ઈન્કાર કર્યો છે.
ઈરાનની રાષ્ટ્રીય સુરક્ષા પરિષદ દ્વારા ઈઝરાયેલને ચેતવણી આપવામાં આવી છે. તેમાં કહેવામાં આવ્યું છે કે, ‘જો દક્ષિણ લેબનોનમાં ગોળીબાર થોડા કલાકોમાં બંધ નહીં થાય તો હવાઈ અને મિસાઈલ યુનિટ તેલ અવીવ પર હુમલો કરશે…’
લેબનોન પર મૂંઝવણ
પાકિસ્તાનના વડા પ્રધાન શહેબાઝ શરીફે કહ્યું હતું કે, ‘મને એ જાહેરાત કરતાં ખૂબ જ આનંદ થાય છે કે ઈરાન અને અમેરિકા તેમના સહયોગીઓ સાથે લેબનોન અને અન્ય સ્થળોએ તાત્કાલિક યુદ્ધવિરામ માટે સંમત થયા છે. આ નિર્ણય હવેથી લાગુ થશે.
ટ્રમ્પ અને જેડી વેન્સ બંનેએ ઇનકાર કર્યો હતો
યુએસ વાઇસ પ્રેસિડેન્ટ જેડી વેન્સે કહ્યું, ‘મને લાગે છે કે ગેરસમજ થઈ છે. મને લાગે છે કે ઈરાનીઓ માની રહ્યા હતા કે યુદ્ધવિરામમાં લેબનોનનો પણ સમાવેશ થાય છે. જોકે, એવું નથી.’ તેમણે કહ્યું કે અમેરિકાનું માનવું છે કે યુદ્ધવિરામ ઈરાન અને અમેરિકાના સહયોગી દેશો પર ધ્યાન કેન્દ્રિત કરશે. જેમાં ઈઝરાયેલ અને આરબ દેશોનો સમાવેશ થાય છે.
