ફાસ્ટ બોલર મોહમ્મદ શમીએ મુખ્ય પસંદગીકાર અજીત અગરકર દ્વારા પોતાની ફિટનેસને લઈને આપેલા નિવેદન પર પ્રતિક્રિયા આપી છે. મોહમ્મદ શમી રણજી ટ્રોફીમાં બંગાળ તરફથી રમી રહ્યો છે. તેણે ઉત્તરાખંડ સામેની મેચમાં જોરદાર પ્રદર્શન કર્યું છે. મોહમ્મદ શમીની આગામી ઓસ્ટ્રેલિયા શ્રેણી માટે ટીમમાં પસંદગી કરવામાં આવી નથી. ટીમની જાહેરાત કરતી વખતે ચીફ સિલેક્ટર અજીત અગરકરે કહ્યું હતું કે શમીની ફિટનેસ અંગે તેમની પાસે કોઈ અપડેટ નથી. જોકે, શમીએ એક વીડિયો જાહેર કરીને કહ્યું કે તે સંપૂર્ણ રીતે ફિટ છે.
અગરકરે શુક્રવારે સ્પષ્ટતા કરી હતી કે મોહમ્મદ શમીને ઈંગ્લેન્ડ શ્રેણી માટે પસંદ કરવામાં આવ્યો નથી કારણ કે તે ફિટ નથી અને છેલ્લા છથી આઠ મહિનામાં તેની સામાન્ય મેચ ફિટનેસ સારી નથી. અગરકરે શુક્રવારે એક ઈવેન્ટ દરમિયાન કહ્યું કે, જો શમી અહીં હોત તો મેં તેને જવાબ આપ્યો હોત. જો તે ફિટ છે તો આપણી પાસે શમી જેવો બોલર કેમ નથી? મેં તેની સાથે ઘણી વખત વાત કરી છે. છેલ્લા છથી આઠ મહિનામાં અમને ખબર પડી કે તે ફિટ નથી. તે ઈંગ્લેન્ડ પ્રવાસ માટે પસંદગી માટે યોગ્ય નહોતો.
ઉત્તરાખંડ સામે બંગાળની રણજી ટ્રોફીની મેચ પહેલા, શમીએ ઓસ્ટ્રેલિયા સામેની આગામી વનડે મેચો માટે અવગણના થવા પર નારાજગી વ્યક્ત કરી હતી. તેણે કહ્યું હતું કે જો તે રણજી ટ્રોફી માટે ફિટ હોત તો 50 ઓવરની ક્રિકેટ પણ રમી શક્યો હોત.
ઈડન ગાર્ડન્સમાં ત્રીજા દિવસની રમત બાદ મોહમ્મદ શમીએ કહ્યું, “તે જે કહેવા માંગે છે તે કહી શકે છે.” તમે જોયું કે હું કેવી રીતે બોલિંગ કરતો હતો. બધુ તમારી નજર સામે છે.” રણજી ટ્રોફી મેચમાં બંગાળ તરફથી રમતા મોહમ્મદ શમીએ પ્રથમ દાવમાં ત્રણ વિકેટ ઝડપી હતી. તેણે એક જ ઓવરમાં ત્રણેય વિકેટ ઝડપી હતી. શમીએ રણજીમાં 90 મેચ રમી છે અને 340 વિકેટ લીધી છે.
