બાંગ્લાદેશના અનુભવી વિકેટકીપર-બેટ્સમેન મુશફિકુર રહીમે તેની 100મી ટેસ્ટ મેચમાં સદી ફટકારીને તેને યાદગાર બનાવી દીધી હતી. ઢાકામાં આયર્લેન્ડ સામે રમાયેલી બીજી ટેસ્ટમાં રહીમે બંને ઇનિંગ્સમાં અડધી સદી ફટકારીને એક ખાસ ક્લબમાં જગ્યા બનાવી લીધી છે. બાંગ્લાદેશના અનુભવી બેટ્સમેને પ્રથમ દાવમાં 106 રન અને બીજા દાવમાં અણનમ 53 રન બનાવ્યા હતા. 100મી ટેસ્ટની બંને ઇનિંગ્સમાં 50થી વધુ રન બનાવનાર રિકી પોન્ટિંગ પછી તે બીજો બેટ્સમેન બન્યો છે.
બેટ્સમેન મુશફિકુર રહીમ ટેસ્ટ ઈતિહાસમાં તેની 100મી ટેસ્ટની બંને ઈનિંગ્સમાં 50 કે તેથી વધુ રન બનાવનાર માત્ર બીજો ખેલાડી બન્યો છે. રહીમે 100મી ટેસ્ટની પ્રથમ ઇનિંગમાં સદી ફટકારી અને આવી સિદ્ધિ મેળવનાર વિશ્વનો 11મો ખેલાડી બન્યો. ઓસ્ટ્રેલિયાના દિગ્ગજ ખેલાડી રિકી પોન્ટિંગે તેની 100મી ટેસ્ટમાં સિડનીમાં દક્ષિણ આફ્રિકા સામે 120 અને 143* રનની ઐતિહાસિક ઈનિંગ્સ રમી અને ઈતિહાસના સુવર્ણ પાનામાં પોતાનું નામ નોંધાવ્યું. પોન્ટિંગે બંને ઇનિંગ્સમાં સદી ફટકારીને વધુ એક અનોખો રેકોર્ડ બનાવ્યો હતો, જેને સ્પર્શ કરવાનું રહીમ ચૂકી ગયો હતો.
રહીમ 100મી ટેસ્ટમાં સૌથી વધુ રન બનાવનાર ત્રીજો બેટ્સમેન બની ગયો છે. 100મી ટેસ્ટમાં રિકી પોન્ટિંગે 263 રન અને જો રૂટે 258 રન બનાવ્યા હતા. રહીમે 159 રન બનાવ્યા હતા. મુશ્ફિકુર રહીમે તેની 100મી ટેસ્ટમાં સદી ફટકારીને બાંગ્લાદેશે આયર્લેન્ડ સામેની બીજી ટેસ્ટ 217 રનથી જીતીને શ્રેણી 2-0થી ક્લીન સ્વીપ કરી હતી. પ્રથમ દાવમાં 106 રન બનાવ્યા બાદ મુશફિકરે બીજી ઇનિંગમાં 53 રનની અણનમ ઇનિંગ રમીને મેચમાં કુલ 159 રન બનાવ્યા હતા જ્યારે લિટન દાસે 128 રનની સદી ફટકારી હતી. આ સાથે યજમાન ટીમે પ્રથમ દાવમાં 476 રન બનાવ્યા હતા.
આયર્લેન્ડના ઓફ સ્પિનર એન્ડી મેકબ્રાને 109 રનમાં છ વિકેટ લઈને બાંગ્લાદેશને 500 રનથી ટૂંકાવી દીધા હતા. પરંતુ તૈજુલ ઈસ્લામે બંને દાવમાં 76 અને 94 રન આપીને ચાર વિકેટ લીધી હતી. આ સાથે તે 250 ટેસ્ટ વિકેટ ઝડપનાર પ્રથમ બાંગ્લાદેશી બોલર બન્યો છે. આયરિશ ટીમ પ્રથમ દાવમાં 265 રનમાં સમેટાઈ ગઈ હતી.
પરંતુ બાંગ્લાદેશે ફોલોઓન આપ્યું ન હતું. બીજી ઇનિંગમાં શાદમાન ઇસ્લામ (78) અને મહમુદુલ હસન જોય (60)એ મળીને 119 રનની ભાગીદારી કરી હતી. આ પછી મોમિનુલ હકે 87 રન બનાવ્યા હતા જેના કારણે બાંગ્લાદેશે ચાર વિકેટે 297 રન પર ઇનિંગ્સ ડિકલેર કરી હતી. હવે આયર્લેન્ડને જીતવા માટે 509 રનનો મુશ્કેલ ટાર્ગેટ મળ્યો છે. આયરિશ જોડી હેરી ટેક્ટર (50) અને કર્ટિસ કેમ્પર (અણનમ 71) મક્કમ રહી અને મેચને પાંચમા દિવસે લઈ ગઈ. પરંતુ તેનો બીજો દાવ 291 રન પર સમાપ્ત થયો હતો. બાંગ્લાદેશે પ્રથમ મેચ એક ઇનિંગ્સ અને 47 રને જીતી હતી.
