કોલકાતા નાઈટ રાઈડર્સે શનિવારે ભારતીય ક્રિકેટ બોર્ડની સૂચના પર ઈન્ડિયન પ્રીમિયર લીગની આગામી સિઝન પહેલા બાંગ્લાદેશના ઝડપી બોલર મુસ્તાફિઝુર રહેમાનને તેમની ટીમમાંથી મુક્ત કર્યો હતો. ભારત અને બાંગ્લાદેશ વચ્ચેના દ્વિપક્ષીય સંબંધોમાં વધી રહેલા તણાવને ધ્યાનમાં રાખીને BCCIએ આ પગલું ભર્યું છે. બાંગ્લાદેશના સ્ટાર ફાસ્ટ બોલર મુસ્તાફિઝુર રહેમાને કોલકાતા નાઈટ રાઈડર્સ દ્વારા બહાર કરાયા બાદ પોતાની પ્રથમ પ્રતિક્રિયા આપી છે. રહેમાન IPLનો ભાગ ન બનવાથી નિરાશ છે.
ઈન્ડિયા ટુડેના અહેવાલ મુજબ, આ બોલરે બાંગ્લાદેશમાં સ્થાનિક મીડિયા BDcrictime સાથે વાત કરતા પોતાની નિરાશા વ્યક્ત કરી હતી. તેણે કહ્યું, “જો તમને ટીમમાંથી બહાર કરવામાં આવે તો તમે બીજું શું કરી શકો? KKRએ ગયા મહિને ખેલાડીઓની હરાજીમાં ડાબોડી ફાસ્ટ બોલર રહેમાનને રૂ. 9.20 કરોડમાં ખરીદ્યો હતો. તેની બેઝ પ્રાઈસ રૂ. 2 કરોડ હતી. ચેન્નાઈ સુપર કિંગ્સ અને દિલ્હી કેપિટલ્સ સાથે કઠિન બિડિંગ પ્રક્રિયા પછી, KKR આ 30 વર્ષીય બોલરને ટીમમાં સામેલ કરવામાં સફળ રહ્યો હતો.
બીસીસીઆઈએ કહ્યું કે 26 માર્ચથી શરૂ થનારી લીગમાં જરૂર પડ્યે કેકેઆરને તેના સ્થાને અન્ય ખેલાડીની પસંદગી કરવાની મંજૂરી આપવામાં આવશે. “બીસીસીઆઈએ કોલકાતા નાઈટ રાઈડર્સને તેમની ટીમમાંથી મુસ્તફિઝુર રહેમાનને મુક્ત કરવા કહ્યું છે,” બીસીસીઆઈના સચિવ દેવજીત સૈકિયાએ પીટીઆઈને જણાવ્યું હતું. જો જરૂર પડે તો તે પોતાની જગ્યાએ અન્ય ખેલાડીની પસંદગી માટે કહી શકે છે. જો તે વિનંતી કરશે તો બીસીસીઆઈ તેને અન્ય કોઈ ખેલાડીને પોતાની ટીમમાં સામેલ કરવાની મંજૂરી આપશે.
જ્યારે સૈકિયાને પૂછવામાં આવ્યું કે બીસીસીઆઈએ કોલકાતા નાઈટ રાઈડર્સને આવું કરવાનું શા માટે કહ્યું, તો તેણે કહ્યું, “તાજેતરની ઘટનાઓને કારણે.” કેકેઆરએ બાદમાં કહ્યું કે તેણે બીસીસીઆઈના નિર્દેશો પર કામ કર્યું છે. ફ્રેન્ચાઇઝીએ એક નિવેદનમાં જણાવ્યું હતું કે, “કોલકાતા નાઇટ રાઇડર્સ પુષ્ટિ કરે છે કે IPL રેગ્યુલેટર BCCI-IPL એ ઇન્ડિયન પ્રીમિયર લીગ (IPL) ની આગામી સિઝન પહેલા ટીમમાંથી મુસ્તાફિઝુર રહેમાનને મુક્ત કરવાનો નિર્દેશ આપ્યો છે.” KKRએ કહ્યું, “યોગ્ય પ્રક્રિયા અને પરામર્શ પછી, (ખેલાડીને) ભારતીય ક્રિકેટ બોર્ડની સૂચના પર મુક્ત કરવામાં આવ્યો છે.”
