ઈઝરાયેલના વડાપ્રધાન બેન્જામિન નેતન્યાહુએ રવિવારે દેશની વિદેશી ગુપ્તચર સંસ્થા મોસાદના નવા વડાની ઔપચારિક નિમણૂક કરી છે. નેતન્યાહુએ આ કામની જવાબદારી મેજર જનરલ રોમન ગોફમેનને સોંપી છે. ઈઝરાયેલના આ નિર્ણયને ઘણો મહત્વનો માનવામાં આવી રહ્યો છે. કારણ કે ગોફમેનને ગુપ્તચર બાબતોનો કોઈ અનુભવ નથી અને હવે તે વિશ્વની સૌથી શક્તિશાળી ગુપ્તચર એજન્સીઓમાંની એક મોસાદનું નેતૃત્વ કરશે.
માહિતી અનુસાર, મોસાદના નવા ચીફ વર્તમાન ચીફ ડેવિડ બાર્નિયાનો પાંચ વર્ષનો કાર્યકાળ પૂરો થયા બાદ 2 જૂન, 2026થી આ જવાબદારી સંભાળશે. અગાઉ ડિસેમ્બરમાં જ આ પદ માટે ગોફમેનની પસંદગી કરવામાં આવી હતી, જેને હવે ઔપચારિક મંજૂરી મળી ગઈ છે.
રોમન ગોફમેન કોણ છે?
ગોફમેનનો જન્મ 1976માં બેલારુસમાં થયો હતો પરંતુ તે 14 વર્ષનો હતો ત્યારે તે ઈઝરાયેલ ગયો હતો. તે 1995માં આર્મીમાં જોડાયો હતો અને ત્યારથી તેની લાંબી સૈન્ય કારકિર્દી રહી હતી. 7 ઓક્ટોબર, 2023 ના રોજ હમાસના હુમલા પછી શરૂ થયેલા ગાઝા યુદ્ધ દરમિયાન ગોફમેન નેશનલ કેવેલરી ટ્રેનિંગ સેન્ટરના કમાન્ડર હતા.
માહિતી અનુસાર, 7 ઓક્ટોબરના રોજ દક્ષિણ ઇઝરાયેલના સેડેરોટ શહેરમાં હમાસના લડવૈયાઓ સાથેની અથડામણમાં તેઓ ગંભીર રીતે ઘાયલ થયા હતા. ગોફમેન બાદમાં એપ્રિલ 2024માં વડાપ્રધાન કાર્યાલયમાં જોડાયા હતા. તેમને નેતન્યાહૂના રાષ્ટ્રવાદી વિચારોના કટ્ટર સમર્થક તરીકે જોવામાં આવે છે.
