ન્યૂઝીલેન્ડ ક્રિકેટ ટીમે શનિવારે ઈતિહાસ રચ્યો હતો અને ઈંગ્લેન્ડને ત્રણ મેચની વનડે શ્રેણીમાં 3-0થી ક્લીન સ્વિપ કર્યું હતું. ન્યૂઝીલેન્ડે સ્કાય સ્ટેડિયમ, વેલિંગ્ટન ખાતે રમાયેલી ત્રીજી અને અંતિમ વનડેમાં બે વિકેટથી રોમાંચક વિજય હાંસલ કર્યો હતો. ન્યૂઝીલેન્ડ ક્રિકેટ ટીમના ODI ફોર્મેટના ઈતિહાસમાં આ બીજી વખત છે કે તેણે ઈંગ્લેન્ડને દ્વિપક્ષીય શ્રેણીમાં 3-0થી હરાવ્યું હોય. આ પહેલા કિવી ટીમે 42 વર્ષ પહેલા આ સિદ્ધિ મેળવી હતી. વેલિંગ્ટનમાં રમાયેલી ત્રીજી ODIમાં ન્યૂઝીલેન્ડે ઈંગ્લેન્ડને 222 રનના સ્કોર સુધી રોકી દીધું હતું અને 44.4 ઓવરમાં 8 વિકેટે 226 રન બનાવીને મેચ જીતી લીધી હતી.
ન્યુઝીલેન્ડની ટીમે 1983માં જ્યોફ હોવાર્થની કેપ્ટનશીપમાં ઈંગ્લેન્ડ સામે 3-0થી ક્લીન સ્વીપ કર્યું હતું. બે ઓવલ ખાતે રમાયેલી પ્રથમ વનડેમાં ન્યુઝીલેન્ડે 4 વિકેટે જીત મેળવી હતી. જ્યારે બીજી મેચ હેમિલ્ટનમાં 5 વિકેટે જીતી હતી. અને ત્રીજી મેચમાં અમે 2 વિકેટે જીત મેળવી હતી. ન્યુઝીલેન્ડે સફળતાપૂર્વક પીછો કરીને આ તમામ મેચ જીતી લીધી હતી. વિશ્વ ચેમ્પિયન ઈંગ્લેન્ડ માટે આ શરમજનક હાર છે, જેણે તેના ODI ફોર્મ પર મોટા પ્રશ્નો ઉભા કર્યા છે. મેચની વાત કરીએ તો ન્યુઝીલેન્ડે 223 રનના લક્ષ્યનો પીછો કરતા સારી શરૂઆત કરી હતી. ઓપનર ડેવોન કોનવે અને રચિન રવિન્દ્ર વચ્ચે પ્રથમ વિકેટ માટે 78 રનની ભાગીદારી થઈ હતી.
ડેવોન કોનવે 44 બોલમાં 34 રન બનાવીને આઉટ થયો હતો. કોનવે રન આઉટ થયો હતો. આ પછી આગામી ઓવરમાં રચિન રવિન્દ્ર (46) પણ પેવેલિયન પરત ફર્યો હતો. આગલી ઓવરમાં વિલ યંગ પણ માત્ર એક રન બનાવીને આઉટ થયો હતો. વિકેટકીપર બેટ્સમેન ટોમ લાથમ માત્ર 10 રન બનાવી શક્યો હતો. માઈકલ બ્રેસવેલે 13 રન અને સુકાની મિશેલ સેન્ટનરે 27 રનનું યોગદાન આપ્યું હતું. નાથન સ્મિથે બે રન બનાવ્યા હતા. ડેરિલ મિશેલે 68 બોલમાં 44 રનની ઇનિંગ રમી હતી. ઈંગ્લેન્ડ તરફથી જેમી ઓવરટોન અને કુરેને 2-2 વિકેટ ઝડપી હતી.
આ પહેલા ઈંગ્લેન્ડની ટીમ પૂરી 50 ઓવર પણ રમી શકી ન હતી. ઈંગ્લેન્ડ ક્રિકેટ ટીમ 40.2 ઓવરમાં માત્ર 222 રન જ બનાવી શકી હતી. ઈંગ્લેન્ડ તરફથી જેમી ઓવરટને સૌથી વધુ 68 રન બનાવ્યા હતા. વિકેટકીપર જોસ બટલરે 38 રનનું યોગદાન આપ્યું હતું. ન્યુઝીલેન્ડ માટે ટિકનરે 4 અને ડફીએ 3 વિકેટ લીધી હતી.
