દક્ષિણ આફ્રિકા પહેલાથી જ સેમિફાઇનલમાં પોતાનું સ્થાન નિશ્ચિત કરી ચૂક્યું છે અને હવે ટીમ જીતનો સિલસિલો જાળવી રાખવા અને મંગળવારે કોલંબોમાં પાકિસ્તાન સામે રમાનારી મહિલા ODI વર્લ્ડ કપ 2025ની મેચમાં ગ્રુપ સ્ટેજમાં ટોચના બેમાં સ્થાન મેળવવાની તકો સુધારવા પર ધ્યાન આપશે. કોલંબોનું હવામાન ફરી રમત બગાડી શકે છે પરંતુ જો રમત શક્ય બને તો અત્યાર સુધીમાં આઠ પોઈન્ટ મેળવનારી દક્ષિણ આફ્રિકાની ટીમ લીગ મેચની સમાપ્તિ પહેલા પોતાના ખાતામાં વધુ બે પોઈન્ટ ઉમેરવા ઈચ્છે છે.
જો દક્ષિણ આફ્રિકાની ટીમ લીગ તબક્કામાં ટોપ ટુમાં સ્થાન મેળવે છે, તો તે સેમિફાઇનલમાં ઓસ્ટ્રેલિયાનો સામનો કરવાનું ટાળી શકે છે. ઓસ્ટ્રેલિયા ટેબલમાં ટોચ પર રહેવા માટે પ્રબળ દાવેદાર હોવાનું જણાય છે, જેનો સામનો ચોથા સ્થાને રહેલી ટીમ સાથે થશે. કોલંબોમાં રમાયેલી ઘણી મેચો વરસાદને કારણે રદ્દ કરવી પડી હતી અને આ મેચમાં પણ વરસાદની અસર પડી શકે છે. આ કારણે શ્રીલંકાની રાજધાનીમાં વર્લ્ડ કપ મેચો આયોજિત કરવાના ઈન્ટરનેશનલ ક્રિકેટ કાઉન્સિલ (ICC)ના નિર્ણય પર પણ સવાલો ઉભા થયા છે.
કોલંબોમાં રમાયેલી નવ મેચોમાંથી પાંચમાં ખરાબ હવામાનને કારણે કોઈ પરિણામ આવ્યું ન હતું. પાકિસ્તાનની ટીમની સેમીફાઈનલમાં પહોંચવાની શક્યતા લગભગ સમાપ્ત થઈ ગઈ છે અને આવી સ્થિતિમાં તેની ટીમ પ્રતિષ્ઠા ખાતર આ મેચ રમશે. પાકિસ્તાનની સૌથી મોટી ચિંતા તેની બેટિંગ છે અને જો તેણે જીતવું હોય તો તેના બેટ્સમેનોએ પોતાનું સર્વશ્રેષ્ઠ પ્રદર્શન આપવું પડશે.
દક્ષિણ આફ્રિકાની ટીમ ઘણી મજબૂત દેખાઈ રહી છે. સુકાની લૌરા વોલ્વાર્ડ અને તાઝમીન બ્રિટ્સ જેવા ખેલાડીઓ ટોચના ક્રમમાં ખૂબ જ મજબૂત છે, જ્યારે સુને લુસ અને મેરિજેન કેપ મધ્ય ઓવરોમાં ગતિ જાળવી શકે છે. નાદીન ડી ક્લાર્કે અત્યાર સુધી સારૂ પ્રદર્શન કર્યું છે અને પોતાની જાતને એક સારી ફિનિશર સાબિત કરી છે. તેના મોટાભાગના બેટ્સમેનોનો સ્ટ્રાઈક રેટ 80 થી 120 ની વચ્ચે છે. તેની સરખામણીમાં, પાકિસ્તાનના ટોપ ઓર્ડર બેટ્સમેનમાંથી કોઈનો સ્ટ્રાઈક રેટ 75ની નજીક પણ નથી. મેચ ભારતીય સમય અનુસાર બપોરે 3 વાગ્યે શરૂ થશે.
