ભારત અને શ્રીલંકા વચ્ચે 5 મેચની T20 સીરીઝની પાંચમી અને છેલ્લી મેચ આજે એટલે કે 30 ડિસેમ્બર મંગળવારના રોજ રમાશે. 2025માં ટીમ ઈન્ડિયાની આ છેલ્લી મેચ પણ હશે. આ મેચમાં એક તરફ ટીમ ઈન્ડિયાની નજર મહેમાનોને 5-0થી હરાવવા પર હશે તો બીજી તરફ વાઈસ કેપ્ટન સ્મૃતિ મંધાનાની નજર શુભમન ગિલના રેકોર્ડ પર છે. સ્મૃતિ મંધાના આ વર્ષે 2025માં મહિલા ક્રિકેટમાં સૌથી વધુ રન બનાવનારી બેટ્સમેન બની ગઈ છે, પરંતુ તેની ભૂખ અહીં ખતમ થવાની નથી. મંધાના હવે 2025માં પુરૂષ અને મહિલા ક્રિકેટમાં સંયુક્ત રીતે સૌથી વધુ રન બનાવનાર બેટ્સમેન બનવા માંગે છે. આ માટે તેણે શુભમન ગિલને હરાવવો પડશે.
સ્મૃતિ મંધાનાએ આ કેલેન્ડર વર્ષમાં તમામ ફોર્મેટમાં 1,703 રન બનાવ્યા છે, જે એક વર્ષમાં કોઈપણ મહિલા ખેલાડી દ્વારા બનાવવામાં આવેલા સૌથી વધુ રન છે. તેણે 2025માં પુરૂષ અને મહિલા આંતરરાષ્ટ્રીય ક્રિકેટમાં સૌથી વધુ રન બનાવનાર ખેલાડી બનવા માટે શુભમન ગિલને પાછળ છોડવો પડશે.
શુભમન ગીલે 2025માં 1764 રન બનાવ્યા છે. જો મંધાના આજે શ્રીલંકા સામે 62 રન બનાવવામાં સફળ થાય છે, તો તે આ વર્ષે પુરૂષ અને મહિલા બંને ટીમોમાં સૌથી વધુ રન બનાવનાર ખેલાડી બની જશે.
