મધ્ય પૂર્વના દેશ ઈરાનમાં સ્થિતિ દિવસેને દિવસે ખરાબ થઈ રહી છે. સર્વોચ્ચ નેતા અલી ખામેની સામે લોકોના વિરોધનો વ્યાપ હવે વધી રહ્યો છે. દેશના 31માંથી 21 પ્રાંતોમાં ખામેની વિરુદ્ધ બળવાની ચિનગારી ફાટી નીકળી છે. ઈરાનના પશ્ચિમી પ્રાંતમાં નબળી અર્થવ્યવસ્થા સામે વિરોધ પ્રદર્શન દરમિયાન ગુરુવારે (જાન્યુઆરી 1) ઈરાનના રિવોલ્યુશનરી ગાર્ડના સ્વયંસેવક સભ્યની હત્યા કરવામાં આવી હતી. અધિકારીઓએ આ માહિતી આપી છે. તાજેતરના વિરોધ પ્રદર્શન દરમિયાન સુરક્ષા દળોમાં આ પ્રથમ મૃત્યુ હોવાનું કહેવાય છે.
બુધવારે રાત્રે ‘બાસિજ ફોર્સ’ના 21 વર્ષીય સ્વયંસેવકના મૃત્યુને લઈને આશંકા છે કે વિરોધ પ્રદર્શનો સામે ઈરાન સરકારની કાર્યવાહી વધુ કડક બની શકે છે. રાજધાની તેહરાનમાં વિરોધ ભલે ધીમો પડી ગયો હોય, પરંતુ તે અન્ય પ્રાંતોમાં ફેલાઈ રહ્યો છે. સરકારી સમાચાર એજન્સી ‘IRNA’એ ‘રિવોલ્યુશનરી ગાર્ડ’ના એક સભ્યના મોતની પુષ્ટિ કરી છે. જો કે વિગતવાર માહિતી આપવામાં આવી ન હતી. બાસીજની નજીક ગણાતા ‘સ્ટુડન્ટ ન્યૂઝ નેટવર્ક’એ લોરેસ્તાન પ્રાંતના ડેપ્યુટી ગવર્નર સઈદ પૌરાલીને ટાંકીને કહ્યું હતું કે આ મૃત્યુ માટે વિરોધીઓ જવાબદાર છે.
શા માટે થઈ રહ્યા છે દેખાવો?
પૌરાલીના જણાવ્યા અનુસાર, “આ શહેરમાં જાહેર વ્યવસ્થાની રક્ષા કરતી વખતે ગાર્ડ સભ્ય શહીદ થયો હતો.” તેમણે કહ્યું કે 13 અન્ય બાસીજ સભ્યો અને પોલીસકર્મીઓ પણ ઘાયલ થયા છે. તેમણે કહ્યું કે આ વિરોધ આર્થિક સંકટ, મોંઘવારીને કારણે થઈ રહ્યો છે અને આજીવિકાની ચિંતાની અભિવ્યક્તિ છે. તેમણે એમ પણ કહ્યું કે નાગરિકોની ચિંતાઓને સમજદારીપૂર્વક સંબોધવામાં આવે. આ પ્રદર્શનો તેહરાનથી લગભગ 400 કિલોમીટર દક્ષિણ-પશ્ચિમમાં સ્થિત કૌહદશ્ત શહેરમાં થયા હતા.
તમને જણાવી દઈએ કે ઈરાનનું ચલણ રિયાલ ડૉલરના મુકાબલે ઐતિહાસિક નીચલા સ્તરે પહોંચી ગયું છે. આ ઉપરાંત મોંઘવારી દર 42 ટકાના આસમાને આંબી રહ્યો છે. તેહરાનના પરમાણુ કાર્યક્રમને લઈને અમેરિકા અને પશ્ચિમી દેશોના પ્રતિબંધોને કારણે ઈરાનની અર્થવ્યવસ્થા વર્ષોથી સંઘર્ષ કરી રહી છે. પ્રાદેશિક તણાવને કારણે જૂનમાં ઇઝરાયેલ સાથે 12 દિવસનું હવાઈ યુદ્ધ થયું, જેના કારણે દેશની નાણાકીય સ્થિતિ વધુ ખરાબ થઈ.
