ઈજા પહેલા ઝડપી બોલર બ્લેર ટિકનરના શાનદાર પ્રદર્શનની મદદથી ન્યૂઝીલેન્ડે બીજી ટેસ્ટ ક્રિકેટ મેચના પહેલા દિવસે બુધવારે વેલિંગ્ટન ટેસ્ટની પ્રથમ ઇનિંગમાં વેસ્ટ ઈન્ડિઝને 205 રનમાં આઉટ કરી દીધી હતી.
ટિકનરે 32 રનમાં ચાર વિકેટ લીધી હતી પરંતુ ફિલ્ડિંગ કરતી વખતે પડી ગયો હતો અને તેના ખભામાં ઈજા થઈ હતી. આ પછી તેને સ્ટ્રેચર પર મેદાનની બહાર લઈ જવામાં આવ્યો હતો.
ટિકનરને તેની પ્રથમ ટેસ્ટ મેચ રમી રહેલા માઈકલ રેનો સારો ટેકો મળ્યો. તેણે 65 રન આપીને ત્રણ વિકેટ ઝડપી હતી જેના કારણે વેસ્ટ ઈન્ડિઝની ટીમ 75 ઓવર સુધી મર્યાદિત રહી હતી.
પ્રથમ દિવસની રમતના અંત સુધીમાં ન્યુઝીલેન્ડે તેના પ્રથમ દાવમાં કોઈપણ નુકશાન વિના 24 રન બનાવી લીધા હતા. તે સમયે ડેવોન કોનવે 16 રને અને કેપ્ટન ટોમ લાથમ સાત રન પર રમી રહ્યા હતા. આ રીતે ન્યુઝીલેન્ડ પ્રથમ દાવમાં વેસ્ટ ઈન્ડિઝ કરતા 181 રન પાછળ છે.
ટિકનરની ઈજા સાથે ન્યુઝીલેન્ડના ઈજાગ્રસ્ત ખેલાડીઓની યાદીમાં વધુ એક નામ જોડાઈ ગયું છે. તેની ટીમ પહેલાથી જ મેટ હેનરી, વિલ ઓ’રોર્કે, બેન સીયર્સ, નાથન સ્મિથ અને કાયલ જેમીસન જેવા ઝડપી બોલરો વિના રમી રહી છે. વિકેટકીપર ટોમ બ્લંડેલ પણ હેમસ્ટ્રિંગના તાણને કારણે આ મેચમાં રમી રહ્યો નથી. તેના સ્થાને મિચેલ હેને ટેસ્ટ ક્રિકેટમાં ડેબ્યૂ કરવાની તક મળી.
