ઑસ્ટ્રેલિયા સામે 19 ઑક્ટોબરથી શરૂ થનારી શ્રેણીમાં શુભમન ગિલ ભારતીય ODI કૅપ્ટન તરીકે ડેબ્યૂ કરવા જઈ રહ્યો છે. તે 50 ઓવરના ફોર્મેટમાં ભારતનું કૅપ્ટન કરનાર 28મો ખેલાડી બનશે. તેના પહેલા વિરાટ કોહલી, રોહિત શર્મા, એમએસ ધોની, સૌરવ ગાંગુલી સહિત ઘણા કેપ્ટન ટીમની કમાન સંભાળી ચૂક્યા છે, પરંતુ આ સમયગાળા દરમિયાન એક જ ખેલાડી એવો રહ્યો છે જેણે કેપ્ટન તરીકે પોતાની ડેબ્યૂ મેચમાં સદી ફટકારી હોય. હા, જો શુભમન ગિલ ઓસ્ટ્રેલિયા વિરૂદ્ધ પર્થમાં રમાનાર પ્રથમ વનડેમાં આવું કરવામાં સફળ રહે છે તો તે આ યાદીમાં સામેલ થનારો બીજો ખેલાડી બની જશે.
ODI ફોર્મેટમાં કેપ્ટન તરીકે ડેબ્યૂ કરનારા ભારતીય ખેલાડીઓમાં સચિન તેંડુલકર એકમાત્ર એવો ખેલાડી છે જેણે 100 રનના જાદુઈ આંકડાને સ્પર્શ કર્યો છે. તેની કેપ્ટનશિપની શરૂઆત 1996માં શ્રીલંકા સામે થઈ હતી, જ્યાં તેણે 110 રનની શાનદાર ઈનિંગ રમી હતી.
અજીત વાડેકર ભારતીય ODI ક્રિકેટના ઇતિહાસમાં પ્રથમ કેપ્ટન હતા. તેણે પોતાની ડેબ્યૂ મેચમાં 67 રનની ઇનિંગ રમી હતી. તેના સિવાય અન્ય ત્રણ એવા ખેલાડીઓ છે જેઓ તેમની ODI કેપ્ટનશીપની ડેબ્યૂ મેચમાં 50 કે તેથી વધુ રન બનાવવામાં સફળ રહ્યા હતા. આ યાદીમાં રવિ શાસ્ત્રી, અજય જાડેજા અને શિખર ધવનનો સમાવેશ થાય છે.
