મધ્ય પૂર્વને હચમચાવી દેનાર 40 દિવસના લોહિયાળ સંઘર્ષ પછી બુધવારે વહેલી સવારે વિશ્વએ રાહતનો શ્વાસ લીધો. અમેરિકા અને ઈરાન વચ્ચે ઐતિહાસિક બે સપ્તાહના યુદ્ધવિરામ પર સહમતિ બની છે. આ કરાર હેઠળ ઈરાને વૈશ્વિક અર્થવ્યવસ્થાની લાઈફલાઈન ગણાતા સ્ટ્રેટ ઓફ હોર્મુઝને મર્યાદિત ટ્રાફિક માટે ખોલવાનો પ્રસ્તાવ મૂક્યો છે. પાકિસ્તાનની રાજધાની ઈસ્લામાબાદમાં 10 એપ્રિલે બંને દેશો વચ્ચે ઔપચારિક વાતચીત શરૂ થશે.
વિદેશ મંત્રી અબ્બાસ અરાઘચીએ ઈરાનની સર્વોચ્ચ રાષ્ટ્રીય સુરક્ષા પરિષદ વતી સત્તાવાર નિવેદન જારી કરીને આ રાજદ્વારી પહેલની પુષ્ટિ કરી છે. તેમણે સ્પષ્ટ શબ્દોમાં કહ્યું, “જો ઈરાન સામેના હુમલાઓ સંપૂર્ણપણે બંધ થઈ જશે તો આપણા શક્તિશાળી સશસ્ત્ર દળો પણ તેમની રક્ષણાત્મક કાર્યવાહી બંધ કરી દેશે.” અબ્બાસ અરાઘચીએ વધુમાં સમજાવ્યું કે કરાર હેઠળ, હોર્મુઝ સ્ટ્રેટમાંથી સુરક્ષિત માર્ગ આગામી બે અઠવાડિયા સુધી પ્રદાન કરવામાં આવશે, પરંતુ આ હિલચાલ ઈરાની સશસ્ત્ર દળો સાથે સંકલનને આધિન રહેશે.
તમને જણાવી દઈએ કે વૈશ્વિક તેલ વેપારનો પાંચમો ભાગ આ માર્ગ પરથી પસાર થાય છે, જેને તાજેતરના સંઘર્ષ દરમિયાન ઈરાન દ્વારા અવરોધવામાં આવ્યો હતો.
10-પોઇન્ટ એજન્ડા
આ સમગ્ર કરારની સ્ક્રિપ્ટ તૈયાર કરવામાં પાકિસ્તાને મુખ્ય આર્કિટેક્ટની ભૂમિકા ભજવી છે. ઈરાને પાકિસ્તાન દ્વારા અમેરિકાને 10 મુદ્દાનો પ્રસ્તાવ મોકલ્યો છે, જે ઈસ્લામાબાદમાં થનારી વાતચીતનો મુખ્ય આધાર હશે.
આ મુદ્દાઓ પર ચર્ચા કરવામાં આવશે:
હોર્મુઝ સ્ટ્રેટ પહેલાની જેમ ખુલશે.
