મધ્ય પૂર્વમાં વધતા સૈન્ય તણાવ વચ્ચે, પડોશી દેશના વડા પ્રધાન શાહબાઝ શરીફ ગુરુવારે જેદ્દાહ પહોંચ્યા અને સાઉદી અરેબિયાના ક્રાઉન પ્રિન્સ મોહમ્મદ બિન સલમાન સાથે “મર્યાદિત બેઠક” કરી અને ઈરાન યુદ્ધ વચ્ચે સાઉદી અરેબિયાને પાકિસ્તાનની સંપૂર્ણ એકતા અને સમર્થનની ખાતરી આપી. પાકિસ્તાનના વડાપ્રધાન કાર્યાલય દ્વારા આ માહિતી આપવામાં આવી છે. પાક પીએમ શરીફની સાઉદી અરેબિયાની આ મુલાકાત એવા સમયે થઈ છે જ્યારે આ ક્ષેત્રમાં તણાવ નોંધપાત્ર રીતે વધી ગયો છે. બીજી તરફ પાકિસ્તાન પોતે બે મોરચે યુદ્ધ લડી રહ્યું છે. એક તરફ તેને અફઘાન બોર્ડર પર તાલિબાન સામે લડવાનું છે તો બીજી તરફ તેને બલૂચિસ્તાનમાં બલૂચ બળવાખોરોનો સામનો કરવો પડશે.
બીજી તરફ, અમેરિકા અને ઈઝરાયેલ દ્વારા ઈરાન પરના હુમલાના જવાબમાં, તેહરાને મધ્ય પૂર્વના કેટલાક ખાડી દેશોમાં યુએસ બેઝ તેમજ કોમર્શિયલ અને ઓઈલ ઈન્ફ્રાસ્ટ્રક્ચર પર જવાબી હુમલા શરૂ કર્યા છે, જેનાથી આ ક્ષેત્રમાં મોટા યુદ્ધની આશંકા વધી છે. જેદ્દાહના અબ્દુલ અઝીઝ ઈન્ટરનેશનલ એરપોર્ટ પર આગમન બાદ વડાપ્રધાન શરીફનું મક્કા ક્ષેત્રના ડેપ્યુટી ગવર્નર પ્રિન્સ સઈદ બિન મિશાલ સહિત અનેક વરિષ્ઠ અધિકારીઓએ સ્વાગત કર્યું હતું.
પ્રાદેશિક શાંતિ પર ચર્ચા
પાક પીએમઓએ જણાવ્યું હતું કે બેઠક દરમિયાન, બંને નેતાઓએ મધ્ય પૂર્વની વર્તમાન પરિસ્થિતિ પર વિગતવાર ચર્ચા કરી હતી અને ક્ષેત્રમાં શાંતિ અને સ્થિરતા જાળવવા માટે સાથે મળીને કામ કરવા સંમત થયા હતા. “પાકિસ્તાન હંમેશા સાઉદી અરેબિયાની સાથે મક્કમતાથી ઊભું રહેશે અને ક્ષેત્રમાં શાંતિની સહિયારી ઈચ્છાને આગળ વધારવા માટે પ્રયાસ કરવાનું ચાલુ રાખશે,” પાકિસ્તાનના વડાપ્રધાન કાર્યાલયના નિવેદનમાં કહેવામાં આવ્યું છે.
