યુદ્ધની વચ્ચે સમાધાન લાવવાનો પ્રયાસ કરી રહેલું પાકિસ્તાન હવે અમેરિકાની મજાક ઉડાવતું જોવા મળી રહ્યું છે. દેશના સંરક્ષણ પ્રધાન ખ્વાજા આસિફે કહ્યું છે કે એવું લાગે છે કે યુદ્ધનું કારણ બદલાઈ ગયું છે અને હવે હોર્મુઝ સ્ટ્રેટને ખોલવા પર ધ્યાન કેન્દ્રિત કરવામાં આવ્યું છે. આ નિવેદન એવા સમયે આવ્યું છે જ્યારે પાકિસ્તાને અમેરિકા અને ઈરાન વચ્ચે મધ્યસ્થી અને મંત્રણાની યજમાનીની ઓફર કરી છે.
આસિફે લખ્યું, ‘એવું લાગે છે કે યુદ્ધનું લક્ષ્ય હવે હોર્મુઝની સ્ટ્રેટને ખોલવાનું બની ગયું છે, જે યુદ્ધ પહેલા ખુલ્લું હતું.’ ખાસ વાત એ છે કે તાજેતરમાં જ અમેરિકી રાષ્ટ્રપતિ ડોનાલ્ડ ટ્રમ્પે હોર્મુઝ ખોલવા માટે દેશોને સાથે આવવાની અપીલ કરી હતી. યુદ્ધની વચ્ચે ઈરાને હોર્મુઝ સ્ટ્રેટને બંધ કરવાની જાહેરાત કરી હતી, જેના કારણે વિશ્વના ઘણા દેશોમાં ઈંધણનો પુરવઠો ઠપ થઈ ગયો હતો.
ઈરાને અમેરિકાને આપ્યો ઝટકો
ઈરાને બુધવારે પશ્ચિમ એશિયામાં યુદ્ધવિરામ માટેના અમેરિકાના પ્રસ્તાવને નકારી કાઢ્યો હતો અને ઈઝરાયેલ અને ગલ્ફ આરબ દેશો પર હુમલા તેજ કર્યા હતા. ઈરાને કુવૈત ઈન્ટરનેશનલ એરપોર્ટને પણ નિશાન બનાવ્યું હતું, જેના કારણે ત્યાં ભીષણ આગ લાગી હતી. ઈરાને આ જવાબી હુમલા એવા સમયે કર્યા છે જ્યારે ઈઝરાયેલે તેહરાન પર હવાઈ હુમલા કર્યા હતા અને વોશિંગ્ટન આ વિસ્તારમાં પેરાટ્રૂપર્સ અને મોટી સંખ્યામાં મરીન સૈનિકોને તૈનાત કરી રહ્યા હતા.
પીટીઆઈ અનુસાર, ઈરાનના રાજ્ય સમાચાર પ્રસારણકર્તા ‘પ્રેસ ટીવી’એ એક અજાણ્યા અધિકારીને ટાંકીને કહ્યું કે ઈરાને અમેરિકાના યુદ્ધવિરામ પ્રસ્તાવને ફગાવી દીધો છે.
પાકિસ્તાને ઈરાનને પ્રસ્તાવ મોકલ્યા બાદ પ્રેસ ટીવીના આ સમાચાર આવ્યા છે. “ઈરાન યુદ્ધ ત્યારે જ સમાપ્ત કરશે જ્યારે તે ઇચ્છે અને જ્યારે તેની શરતો પૂરી થશે,” પ્રેસ ટીવીએ અધિકારીના હવાલાથી કહ્યું. અધિકારીએ કહ્યું કે તેહરાન પશ્ચિમ એશિયામાં તેના “જોરદાર હુમલા” ચાલુ રાખશે.
