અમેરિકા-ઈરાન સંઘર્ષમાં પાકિસ્તાનની કથિત દખલગીરીની સમગ્ર કહાની સોશિયલ મીડિયાની ભૂલને કારણે ખુલીને સામે આવી છે. પાકિસ્તાનના વડા પ્રધાન શેહબાઝ શરીફે એક સંદેશ પોસ્ટ કર્યો હતો જે બાદમાં તેને સંપાદિત કરીને દૂર કરવામાં આવ્યો હતો, પરંતુ સ્ક્રીનશોટ વાયરલ થયા હતા. એવું કહેવામાં આવી રહ્યું છે કે પાક પીએમએ અમેરિકાના કહેવા પર આ પોસ્ટ કરી હતી. હવે ખુદ અમેરિકન મીડિયા પણ આ વાતની પુષ્ટી કરતું જણાય છે.
વ્હાઇટ હાઉસે ટ્વીટ જોયું હતું
ન્યૂયોર્ક ટાઈમ્સના અહેવાલ મુજબ, વ્હાઇટ હાઉસે આ પોસ્ટને X પર શેર કરતા પહેલા જ જોઈ હતી અને તેની મંજૂરી પણ આપી દીધી હતી. આ ઘટસ્ફોટ દર્શાવે છે કે પાકિસ્તાનની સ્વતંત્ર રાજદ્વારી પહેલ વાસ્તવમાં અમેરિકા દ્વારા તૈયાર કરવામાં આવેલી સ્ક્રિપ્ટ હતી.
વાસ્તવમાં, રાષ્ટ્રપતિ ડોનાલ્ડ ટ્રમ્પે ઈરાનને અલ્ટીમેટમ આપ્યું હતું કે તે હોર્મુઝ સ્ટ્રેટને ફરીથી ખોલે, નહીં તો અમેરિકા ઈરાનના ઈન્ફ્રાસ્ટ્રક્ચર અને સભ્યતાને નષ્ટ કરી દેશે. ટ્રમ્પે 7 એપ્રિલ (મંગળવારે) રાત્રે 8 વાગ્યા (વોશિંગ્ટન સમય)ની સમયમર્યાદા આપી હતી. આ દરમિયાન પાકિસ્તાને મધ્યસ્થીની ભૂમિકા ભજવી હતી. પાકિસ્તાનના વડાપ્રધાન શાહબાઝ શરીફ અને આર્મી ચીફ ફિલ્ડ માર્શલ અસીમ મુનીર છેલ્લા કેટલાય સપ્તાહોથી અમેરિકા અને ઈરાન વચ્ચે ગુપ્ત સંપર્કો જાળવી રહ્યા હતા. ફાઈનાન્શિયલ ટાઈમ્સના અહેવાલ મુજબ, વ્હાઇટ હાઉસે પાકિસ્તાન પર આ અસ્થાયી યુદ્ધવિરામને અંતિમ સ્વરૂપ આપવા માટે દબાણ કર્યું હતું, જેથી ટ્રમ્પ જાહેરમાં ધમકીઓ આપ્યા પછી પણ પાછળ હટી શકે.
આ પછી, 8 એપ્રિલની સવારે, શહેબાઝ શરીફે તેમના સત્તાવાર હેન્ડલ પરથી પોસ્ટ કર્યું કે અમેરિકા અને ઈરાન વચ્ચે બે અઠવાડિયાનો યુદ્ધવિરામ થઈ ગયો છે. ટ્રમ્પ, જેડી વેન્સ, ઈરાની નેતાઓ અને અન્યને પોસ્ટમાં ટેગ કરવામાં આવ્યા હતા. પરંતુ મૂળ પોસ્ટની ઉપર “Draft – Pakistan’s PM Message on X” લખાયેલું હતું, જે સંપાદન ઇતિહાસમાં સ્પષ્ટપણે દેખાતું હતું. શરીફના સ્ટાફે તેને કોપી-પેસ્ટ કરી અને ડિલીટ કરવાનું ભૂલી ગયા. પાકિસ્તાની અધિકારીઓએ વડા પ્રધાનને પોતાને “પાકિસ્તાનના પીએમ” તરીકે સંબોધવાની જરૂર નથી – આ શબ્દ અમેરિકન અથવા ઇઝરાયેલી ડ્રાફ્ટનો સંદર્ભ હતો.
પડદા પાછળની વાર્તા
ન્યૂયોર્ક ટાઈમ્સે એક સૂત્રને ટાંકીને કહ્યું કે વ્હાઇટ હાઉસે આ નિવેદનને પહેલા જ જોઈ લીધું છે અને તેને મંજૂરી આપી દીધી છે. તેનો અર્થ એ છે કે પાકિસ્તાનની અપીલનું વાસ્તવમાં અગાઉથી સંકલન કરવામાં આવ્યું હતું. ટ્રુથ સોશિયલ પર ટ્રમ્પે લખ્યું છે કે પાકિસ્તાનના વડાપ્રધાન શાહબાઝ શરીફ અને ફિલ્ડ માર્શલ અસીમ મુનીર સાથે વાત કર્યા બાદ તેમણે બે અઠવાડિયા માટે ઈરાન પર બોમ્બ ધડાકા રોકવાનો નિર્ણય લીધો છે. થોડા કલાકો પછી, શહેબાઝ શરીફે બીજી પોસ્ટ પોસ્ટ કરીને યુદ્ધવિરામની જાહેરાતનું સ્વાગત કર્યું.
