ભારતીય ટીમ શનિવારે દક્ષિણ આફ્રિકા સામેની બીજી ટેસ્ટ દરમિયાન નિયમિત કેપ્ટન શુભમન ગિલ વિના રમી શકે છે. આવી સ્થિતિમાં રિષભ પંતને ટીમની કમાન સંભાળવાની તક મળશે. પંત ટેસ્ટ ટીમનો વાઇસ કેપ્ટન છે. ગિલ પ્રથમ ટેસ્ટ દરમિયાન થયેલી ગરદનની ઈજામાંથી સંપૂર્ણ રીતે સાજો થયો નથી અને શુક્રવારે તેની ફિટનેસ ટેસ્ટ કરાવવામાં આવશે. જ્યારે ઓસ્ટ્રેલિયાના પૂર્વ દિગ્ગજ ખેલાડી રિકી પોન્ટિંગે કહ્યું છે કે ભારતીય ટીમનો વિકેટકીપર-બેટ્સમેન ઋષભ પંત ગુવાહાટીમાં યોજાનારી બીજી ટેસ્ટમાં કેપ્ટન્સી સંભાળવા માટે સંપૂર્ણપણે તૈયાર છે.
ICC સમીક્ષા પર, રિકી પોન્ટિંગે ભારપૂર્વક જણાવ્યું હતું કે પંત પાસે અસ્થાયી નેતૃત્વની ભૂમિકાના દબાણને હેન્ડલ કરવાનો સ્વભાવ અને અનુભવ છે. પોન્ટિંગે ઋષભ પંતના નેતૃત્વ કૌશલ્ય પર પૂર્ણ વિશ્વાસ વ્યક્ત કર્યો હતો. રિકી પોન્ટિંગ IPL ફ્રેન્ચાઇઝી દિલ્હી કેપિટલ્સના મુખ્ય કોચ રહી ચૂક્યા છે અને રિષભ પંત કેપ્ટન હતા. બંનેએ ઘણા વર્ષો સુધી સાથે કામ કર્યું છે. ભૂતપૂર્વ ઓસ્ટ્રેલિયન ક્રિકેટર રિકી પોન્ટિંગે કહ્યું, “સ્ટેન્ડ-ઇન કેપ્ટનની ભૂમિકા નિભાવવી ક્યારેય આસાન નથી હોતી, ખાસ કરીને જ્યારે તમે થોડા દિવસો પહેલા જ ટેસ્ટ મેચ હારી ગયા હોવ. રિષભ અત્યારે ખૂબ જ અનુભવી ટેસ્ટ ખેલાડી છે, અને વિકેટકીપર હોવાના કારણે તેને મેચ કેવી રીતે ચાલી રહી છે તે જોવામાં મદદ મળે છે.”
તેણે આગળ કહ્યું, “તેણે છેલ્લા કેટલાક વર્ષોથી IPLની કપ્તાની કરી છે. મને લાગે છે કે તે ઠીક થઈ જશે. તે એક કેપ્ટન તરીકે કેવી રીતે રમે છે અને બેટ્સમેન તરીકે તેની રમવાની શૈલીને કેવી રીતે હેન્ડલ કરે છે તે જોવું રસપ્રદ રહેશે. મને લાગે છે કે તે આ તકને ખૂબ સારી રીતે સંભાળશે.”
બીજી ટેસ્ટમાં શુભમન ગિલના રમવાની શક્યતા ઓછી છે જ્યારે BCCIની સ્પોર્ટ્સ સાયન્સ ટીમ અંતિમ નિર્ણય લેતા પહેલા રાહ જોવા માંગે છે. બીજી અને છેલ્લી ટેસ્ટ શનિવારથી રમાશે. એવું માનવામાં આવે છે કે ગિલને સંપૂર્ણ સ્વસ્થ થવામાં દસ દિવસનો સમય લાગશે. જો તે ટેસ્ટ મેચ રમશે તો તેને રાંચીમાં 30 નવેમ્બરથી શરૂ થનારી ત્રણ મેચની વન-ડે શ્રેણીમાંથી આરામ આપવામાં આવી શકે છે.
