ટીમ ઈન્ડિયાના સ્ટાર વિકેટ-કીપર બેટ્સમેન ઋષભ પંત દક્ષિણ આફ્રિકા A વિરુદ્ધ ચાલી રહેલી બીજી બિનસત્તાવાર ટેસ્ટ દરમિયાન ઈજાગ્રસ્ત થતાં ટીમ મેનેજમેન્ટ અને ચાહકોનું ટેન્શન વધાર્યું હતું. ઈંગ્લેન્ડ પ્રવાસ દરમિયાન ઈજાગ્રસ્ત થયા બાદ રિષભ પંત પ્રથમ વખત આ ટેસ્ટ શ્રેણીમાં રમતા જોવા મળે છે. પ્રથમ મેચમાં તેણે શાનદાર બેટિંગ કરીને પુનરાગમનનો સંદેશ આપ્યો હતો, બીજી ઇનિંગમાં તેણે 90 રનની ઇનિંગ રમી હતી. પરંતુ બીજી ટેસ્ટ દરમિયાન શરીર પર ઘણી વખત બોલ વાગવાથી ઈજાગ્રસ્ત થતાં તે નિવૃત્ત થયો હતો. આ ઘટનાનો વીડિયો સોશિયલ મીડિયા પર વાયરલ થઈ રહ્યો છે.
વીડિયોમાં સ્પષ્ટપણે જોઈ શકાય છે કે પહેલીવાર રિવર્સ સ્કૂપ શોટ રમવાનો પ્રયાસ કરતી વખતે બોલ તેના હેલ્મેટ પર વાગ્યો હતો. આ પછી, એક બોલ તેના કાંડા પર અને બીજો તેની પાંસળીમાં વાગ્યો. શરીર પર વારંવાર બોલ વાગ્યા બાદ, ફિઝિયો સહિત ઘણા લોકો મેદાનમાં પહોંચ્યા અને ઋષભ પંત રિટાયર્ડ હર્ટ થયો અને પેવેલિયન પરત ફર્યો.
ઋષભ પંતની દક્ષિણ આફ્રિકા સામે 14 નવેમ્બરથી શરૂ થનારી બે મેચની ટેસ્ટ શ્રેણી માટે પસંદગી કરવામાં આવી છે, તે આ ટીમનો વાઇસ કેપ્ટન છે. સિરીઝના થોડા દિવસો પહેલા પંતને ઈજા પહોંચવી એ ચિંતાનો વિષય છે.
