ભારતીય ટીમના પૂર્વ કેપ્ટન રોહિત શર્માએ શનિવારે દક્ષિણ આફ્રિકા સામેની ત્રીજી વનડેમાં મોટી સિદ્ધિ હાંસલ કરી છે. તે આંતરરાષ્ટ્રીય ક્રિકેટમાં 20,000થી વધુ રન બનાવનાર ભારતનો ચોથો બેટ્સમેન બન્યો છે. સચિન તેંડુલકર, રાહુલ દ્રવિડ અને વિરાટ કોહલી બાદ આ રેકોર્ડ બનાવનાર તે ચોથો ભારતીય બન્યો છે. રોહિત શર્મા આફ્રિકા સામેની વનડે શ્રેણીમાં શાનદાર ફોર્મમાં છે. તેણે બે મેચમાં અડધી સદીની ઇનિંગ્સ રમી છે. આ પહેલા તેણે ઓસ્ટ્રેલિયામાં સદી ફટકારી હતી.
ભારત માટે સૌથી વધુ રન બનાવવાનો રેકોર્ડ સચિન તેંડુલકરના નામે છે. તેણે 34357 આંતરરાષ્ટ્રીય રન બનાવ્યા છે. T20 અને ટેસ્ટ ક્રિકેટમાંથી સંન્યાસ લઈ ચૂકેલા વિરાટ કોહલીએ 27910 રન બનાવ્યા છે. રાહુલ દ્રવિડના નામે 24208 રન છે. રોહિત શર્માએ શનિવારે દક્ષિણ આફ્રિકા વિરૂદ્ધ પોતાની અડધી સદીની ઇનિંગ દરમિયાન 20,000 રન પૂરા કર્યા.
પૂર્વ કેપ્ટન રોહિત શર્માએ ભારત અને દક્ષિણ આફ્રિકા વચ્ચે રાંચીમાં રમાયેલી પ્રથમ ODI મેચમાં ત્રણ સિક્સર ફટકારીને ODIમાં સૌથી વધુ સિક્સર ફટકારવાનો વર્લ્ડ રેકોર્ડ બનાવ્યો હતો. રોહિત શર્માએ 277 ODI મેચમાં 352 સિક્સર ફટકારવાનો નવો વર્લ્ડ રેકોર્ડ બનાવ્યો છે. આ પહેલા આ રેકોર્ડ પાકિસ્તાનના શાહિદ આફ્રિદીના નામે હતો જેણે 398 વન-ડે મેચ રમીને 351 સિક્સર ફટકારી હતી. રોહિતના નામે હવે 354 સિક્સર છે.
