રોહિત ભારત માટે અનુભવી બેટ્સમેન છે અને તેણે ઓસ્ટ્રેલિયા સામે તાજેતરમાં સમાપ્ત થયેલ ત્રણ મેચની વનડે શ્રેણીમાં ભારતીય જર્સીમાં પુનરાગમન કર્યું હતું. રોહિત ઓસ્ટ્રેલિયા પ્રવાસ પહેલા આ વર્ષે ચેમ્પિયન્સ ટ્રોફીની ફાઇનલમાં ભારત તરફથી છેલ્લે રમ્યો હતો. તેણે 223 દિવસ બાદ આંતરરાષ્ટ્રીય ક્રિકેટમાં પુનરાગમન કર્યું. પર્થમાં રમાયેલી પ્રથમ વનડે મેચમાં રોહિતનું બેટ શાંત હતું, પરંતુ પછીની બે મેચમાં તે પોતાની જૂની લયમાં જોવા મળ્યો હતો. આ સમયગાળા દરમિયાન રોહિત ભારત માટે વનડેમાં સૌથી વધુ રન બનાવનાર ત્રીજો બેટ્સમેન બન્યો હતો.
ઓસ્ટ્રેલિયામાં તેના મજબૂત પ્રદર્શનને કારણે, રોહિત બુધવારે જારી કરાયેલ તાજેતરની ICC રેન્કિંગમાં બે સ્થાનનો સુધારો કરીને ટોચ પર આવી ગયો છે. આ પહેલીવાર છે જ્યારે રોહિત ODIમાં ટોપ બેટ્સમેન બન્યો છે. રોહિત ભારતીય ODI કેપ્ટન શુભમન ગિલને પાછળ છોડીને નંબર વન ODI બેટ્સમેન બન્યો છે. ગયા અઠવાડિયે રોહિતના 745 રેટિંગ પોઈન્ટ હતા, પરંતુ તેણે બીજી વનડેમાં 73 રન બનાવ્યા અને ઓસ્ટ્રેલિયા સામેની ત્રીજી મેચમાં અણનમ 121 રન બનાવ્યા. સતત બે મેચમાં તેની મોટી ઇનિંગ્સના કારણે તેના રેટિંગ પોઈન્ટ 781 સુધી પહોંચી ગયા અને તે ટોપ પર આવવામાં સફળ રહ્યો. જ્યારે ગિલ ત્રીજા સ્થાને સરકી ગયો છે. અફઘાનિસ્તાનનો ઇબ્રાહિમ ઝદરાન બીજા સ્થાને યથાવત છે. ત્રીજી મેચમાં ઈજાગ્રસ્ત શ્રેયસ અય્યર પણ એક સ્થાન સુધરીને નવમા સ્થાને પહોંચી ગયો છે.
