ભારતના સ્ટાર બેટ્સમેન રોહિત શર્માએ 2023 ODI વર્લ્ડ કપ ફાઇનલમાં હારને લઈને મોટો ખુલાસો કર્યો છે. તેણે કહ્યું કે તે હારથી એટલો દુખી છે કે તેણે સંન્યાસ લેવાનો નિર્ણય લીધો છે. રોહિત શર્માએ જણાવ્યું કે ઓસ્ટ્રેલિયા સામેની ફાઈનલ હાર બાદ તેનું દિલ એટલું ભાંગી ગયું હતું કે તેણે ક્રિકેટને હંમેશ માટે અલવિદા કહેવાનો નિર્ણય લીધો હતો. જો કે, રોહિતે હાર માની ન હતી અને સંપૂર્ણ ધ્યાન આગામી વર્ષના T20 વર્લ્ડ કપ (2024) પર કેન્દ્રિત કર્યું હતું, જ્યાં ભારતે દક્ષિણ આફ્રિકાને હરાવીને ટાઇટલ જીત્યું હતું.
રોહિત શર્માએ ભારતમાં રમાયેલા ODI વર્લ્ડ કપ 2023માં જોરદાર પ્રદર્શન કર્યું અને ટીમને ફાઇનલમાં પહોંચાડી. રોહિતે ટૂર્નામેન્ટમાં 11 મેચમાં 54.27ની એવરેજથી 597 રન બનાવ્યા હતા. ફાઇનલમાં ભારતીય બેટ્સમેનો અપેક્ષા મુજબ પ્રદર્શન કરી શક્યા ન હતા અને 50 ઓવરમાં માત્ર 240 રન જ બનાવી શક્યા હતા. ઓસ્ટ્રેલિયન ટીમે આ નાનકડા ટાર્ગેટને સરળતાથી હાંસલ કરી લીધો હતો. ટ્રેવિસ હેડે 120 બોલમાં 137 રનની વિસ્ફોટક ઇનિંગ રમી હતી. રોહિતે કહ્યું કે આ તેના માટે ખૂબ જ મુશ્કેલ સમય હતો, કારણ કે 2022માં કેપ્ટન બન્યા બાદ તેનો પહેલો લક્ષ્ય વર્લ્ડ કપ જીતવાનો હતો.
રોહિત શર્માએ કહ્યું, “દરેક જણ ખૂબ જ દુઃખી હતા અને જે બન્યું તે અમે માનતા નહોતા. વ્યક્તિગત રીતે મારા માટે તે ખૂબ જ મુશ્કેલ સમય હતો કારણ કે મેં તે વર્લ્ડ કપમાં માત્ર બે-ત્રણ મહિના પહેલાં જ નહીં, પરંતુ 2022માં કેપ્ટનશિપ સંભાળી ત્યારથી બધું જ મૂકી દીધું હતું.
તેણે આગળ કહ્યું, “અમદાવાદમાં હાર પછી, મને પ્રામાણિકપણે લાગ્યું કે હું હવે ક્રિકેટ રમવા માંગતો નથી. મેં તે વર્લ્ડ કપ માટે બધું જ આપી દીધું હતું. જ્યારે અમે હારી ગયા ત્યારે મને લાગ્યું કે મારા શરીર અને મનમાં કંઈ જ બચ્યું નથી. એવું લાગતું હતું કે રમતે મારી બધી શક્તિ છીનવી લીધી છે.”
