નવી દિલ્હીઃ રાષ્ટ્રીય સ્વયંસેવક સંઘ (RSS)ના વડા મોહન ભાગવતે શનિવારે કહ્યું હતું કે ભારતમાં કોઈ બિન-હિંદુ નથી અને તમામ લોકો એક જ પૂર્વજોના વંશજ છે. તેમણે કહ્યું કે મુસ્લિમો અને ખ્રિસ્તીઓ પણ ભારતીય સંસ્કૃતિના અનુયાયીઓ છે. ભાગવતે આ નિવેદન ‘સંઘની 100 વર્ષની યાત્રા: ‘નયે ક્ષિતિજ’ કાર્યક્રમમાં આપ્યું હતું, જ્યાં તેમણે હિન્દુ સમાજની એકતા અને ભારતની સાંસ્કૃતિક ઓળખ પર ભાર મૂક્યો હતો.
તેમણે કહ્યું કે ભારતની જવાબદારી હિંદુઓની છે અને આરએસએસનો ઉદ્દેશ્ય સત્તા મેળવવાનો નથી પરંતુ રાષ્ટ્રના ગૌરવ માટે હિંદુ સમાજને સંગઠિત કરવાનો છે. તેમણે કહ્યું કે સંઘનો ઉદ્દેશ્ય સમાજને એક કરવાનો અને ભારત માતાની ગરિમા વધારવાનો છે. તેમણે એમ પણ કહ્યું કે ભારતનું રાષ્ટ્રત્વ અંગ્રેજોની નહીં પરંતુ પ્રાચીન સંસ્કૃતિની ભેટ છે અને આપણી મૂળ સંસ્કૃતિ હિન્દુ સંસ્કૃતિ છે.
ધર્મો વિશે વાત કરતા ભાગવતે કહ્યું કે વાસ્તવમાં ભારતમાં કોઈ બિન-હિંદુ નથી. બધા મુસ્લિમો અને ખ્રિસ્તીઓ એક જ પૂર્વજોના વંશજો છે, ફક્ત તેઓને તેને ભૂલી જવાની ફરજ પાડવામાં આવી છે. તેમણે કહ્યું કે જાણતા હોય કે અજાણતા દરેક વ્યક્તિ ભારતીય સંસ્કૃતિને અનુસરે છે. તેથી, ભારતમાં દરેક વ્યક્તિ હિંદુ છે, કારણ કે હિંદુ હોવાનો અર્થ ભારત પ્રત્યે જવાબદારી લેવી.
તેમણે કહ્યું કે સંઘ હિન્દુ સમાજનું સંગઠન છે અને તેથી જ ભારત હિન્દુ રાષ્ટ્ર છે. આ બંધારણને અનુરૂપ છે, કારણ કે સંઘ કોઈની વિરુદ્ધ નહીં પરંતુ સમાજને સંગઠિત કરવાનું કામ કરે છે. તેમણે સ્પષ્ટતા કરી હતી કે સંઘ કોઈ પ્રતિક્રિયાવાદી સંગઠન નથી. સંઘ પૂર્ણ કરવા આવ્યો છે, નાશ કરવા નથી.
સંઘના વડાએ કહ્યું કે RSSએ હવે સમાજમાં વિશ્વસનીયતા હાંસલ કરી છે, પરંતુ હજુ સંતુષ્ટ નથી. તેમણે કહ્યું કે ભારતે પોતાની ઓળખને યાદ રાખવી પડશે અને વિવિધતાને ખલેલ પહોંચાડ્યા વિના એકતા સ્થાપિત કરવી પડશે. તેમણે કહ્યું કે સંઘ હવે એવા લોકો સાથે વાતચીત કરી રહ્યું છે જેઓ પોતાને હિંદુ નથી માનતા.
