પશ્ચિમ એશિયામાં છેલ્લા બે સપ્તાહથી ચાલી રહેલા ભીષણ યુદ્ધ વચ્ચે ઈરાને મોટો દાવો કર્યો છે. ઈરાનનો દાવો છે કે અમેરિકા અને ઈઝરાયેલ સામેના આ યુદ્ધમાં ઈરાનને રશિયા અને ચીનનો સૈન્ય સહયોગ પણ મળી રહ્યો છે. બંને દેશોને પોતાના ‘વ્યૂહાત્મક ભાગીદાર’ ગણાવતા ઈરાનના વિદેશ મંત્રી અબ્બાસ અરાઘચીએ કહ્યું છે કે પશ્ચિમ એશિયામાં ચાલી રહેલા સંઘર્ષમાં તેમને આ બંને દેશો તરફથી ‘લશ્કરી સહયોગ’ મળી રહ્યો છે.
ઈરાનના વિદેશ મંત્રીએ રવિવારે એક મહત્વપૂર્ણ ઈન્ટરવ્યુમાં આ વાતનો ખુલાસો કર્યો છે. “ચીન અને રશિયા ઈરાનના ‘વ્યૂહાત્મક ભાગીદારો’ છે, અને તેઓ આ સંઘર્ષને સમર્થન આપી રહ્યા છે. આમાં લશ્કરી સહયોગ પણ સામેલ છે,” અરાઘચીએ નિવેદનમાં જણાવ્યું હતું. “હું આનાથી સંબંધિત કોઈ વિગતો આપી શકતો નથી, પરંતુ ઈરાનનો આ દેશો સાથે રાજકીય, આર્થિક અને સૈન્ય સ્તરે સારો સહયોગ છે.”
ટ્રમ્પે શંકા વ્યક્ત કરી હતી
આ પહેલા અમેરિકી રાષ્ટ્રપતિ ડોનાલ્ડ ટ્રમ્પે ગયા અઠવાડિયે એક નિવેદનમાં કહ્યું હતું કે તેમને શંકા છે કે રશિયાના રાષ્ટ્રપતિ વ્લાદિમીર પુતિન યુદ્ધમાં ટ્રમ્પની થોડી મદદ કરી રહ્યા છે. ટ્રમ્પે કહ્યું હતું કે, “મને લાગે છે કે તે કદાચ થોડી મદદ કરી રહ્યા છે અને કદાચ તેઓ એવું પણ વિચારે છે કે અમે યુક્રેનની મદદ કરી રહ્યા છીએ.” ટ્રમ્પનું આ નિવેદન એવા અહેવાલો પછી આવ્યું છે જેમાં દાવો કરવામાં આવ્યો હતો કે રશિયા ઈરાનને અમેરિકન સૈન્ય મથકો સાથે જોડાયેલી ગુપ્ત માહિતી આપી રહ્યું છે.
સમાધાન કરવાનો ઇનકાર
દરમિયાન, અરાઘચીએ પણ વાતચીતની શક્યતા નકારી કાઢી છે. ઈરાને કહ્યું છે કે વર્તમાન યુદ્ધનો અંત ત્યારે જ શક્ય છે જો હુમલાઓનું પુનરાવર્તન નહીં થાય તેવી મજબૂત ગેરંટી હોય. અરાઘચીએ એક અગ્રણી અરબી અખબાર ‘અલ-અરબી અલ-જાદીદ’ સાથે વાત કરતાં સ્પષ્ટ કર્યું કે યુદ્ધનો અંત ત્યારે જ શક્ય છે જ્યારે હુમલાઓનું પુનરાવર્તન નહીં થાય તેની મજબૂત ખાતરી હોય. આ સાથે, તેમણે સંઘર્ષ દરમિયાન થયેલા નુકસાન માટે નુકસાનની ચૂકવણી અથવા વળતરની માંગ પણ ઉઠાવી છે. અરાઘચીએ પ્રદેશમાં થયેલા હુમલાઓની નજીકથી તપાસ કરવા માટે પ્રાદેશિક દેશો સાથે સંયુક્ત તપાસ સમિતિની રચનાનો પણ પ્રસ્તાવ મૂક્યો છે.
