થાઈલેન્ડમાં બુધવારે સવારે એક ભયાનક અકસ્માત થયો હતો. અહીં નિર્માણાધીન હાઇ-સ્પીડ રેલ લાઇન પર પેસેન્જર ટ્રેન પર ક્રેન પડતાં ટ્રેન પાટા પરથી ઉતરી ગઇ હતી. આ અકસ્માતમાં ઓછામાં ઓછા 22 લોકોએ જીવ ગુમાવ્યા છે. ટ્રેનના ડબ્બામાં ઘણા લોકો ફસાયા હોવાની આશંકા છે. અધિકારીઓએ જણાવ્યું કે આ ઘટના સ્થાનિક સમય અનુસાર સવારે 9 વાગ્યાની આસપાસ બની હતી.
નાખોન રત્ચાસિમાના જનસંપર્ક વિભાગના જણાવ્યા અનુસાર, એલિવેટેડ હાઇ-સ્પીડ રેલ્વે બનાવવા માટે ક્રેનનો ઉપયોગ કરવામાં આવી રહ્યો હતો. બુધવારે બેંગકોકથી ઉબોન રતચથાની જઈ રહેલી ટ્રેન પર અચાનક ક્રેન પડી ગઈ હતી. મૃત્યુઆંક હજુ વધી શકે છે કારણ કે પોલીસે કહ્યું છે કે અકસ્માતમાં 30 થી વધુ લોકો ઘાયલ થયા છે.
મળતી માહિતી મુજબ, ટ્રેન પાટા પરથી ઉતરતાની સાથે જ આગ લાગી ગઈ હતી. હાલ આગ પર કાબુ મેળવી લેવામાં આવ્યો છે અને રેસ્ક્યુ ટીમ ટ્રેનની અંદર ફસાયેલા લોકોને શોધી રહી છે. પરિવહન મંત્રી પીફટ રત્ચકિતપ્રકને જણાવ્યું હતું કે ટ્રેનમાં 195 લોકો સવાર હતા અને અધિકારીઓ મૃતકોની ઓળખ કરવા માટે કામ કરી રહ્યા છે.
