ઝિમ્બાબ્વે ટી20 ક્રિકેટના કેપ્ટન સિકંદર રઝા માટે વર્ષ 2025 ખૂબ જ દુઃખદ રીતે સમાપ્ત થયું. રઝાના નાના ભાઈ મોહમ્મદ મહદીનું સોમવારે (29 ડિસેમ્બર) હરારેમાં અવસાન થયું હતું. તે માત્ર 13 વર્ષનો હતો. ઝિમ્બાબ્વે ક્રિકેટ દ્વારા જાહેર કરવામાં આવેલા સત્તાવાર નિવેદન અનુસાર, મોહમ્મદ મહદીનો જન્મ હિમોફિલિયા નામની દુર્લભ આનુવંશિક રોગ સાથે થયો હતો. આ રોગમાં શરીરની લોહી ગંઠાઈ જવાની ક્ષમતા ઘટી જાય છે.
થોડા દિવસો પહેલા, મોહમ્મદ મહદીની સ્વાસ્થ્ય કેટલીક ગંભીર ગૂંચવણોને કારણે કથળી હતી, જેના પગલે તેમનું અકાળે અવસાન થયું હતું. ઝિમ્બાબ્વે ક્રિકેટ બોર્ડે રઝા અને તેના પરિવાર પ્રત્યે ઊંડી સંવેદના વ્યક્ત કરતા ટ્વિટર પર લખ્યું, “ઝિમ્બાબ્વે ક્રિકેટ ટી20 કેપ્ટન એલેક્ઝાંડર રઝા અને તેના પરિવાર પ્રત્યે દિલથી સંવેદના વ્યક્ત કરે છે. બોર્ડ, મેનેજમેન્ટ, ખેલાડીઓ અને સ્ટાફ આ દુઃખની ઘડીમાં એલેક્ઝાંડર અને તેના પરિવાર સાથે એકજૂથ છે. અલ્લાહ તેમને આ મુશ્કેલ સમયને સહન કરવાની શક્તિ આપે.”
સિકંદર રઝા તાજેતરમાં ILT20 2025 માં શારજાહ વોરિયર્સ માટે રમતા જોવા મળ્યા હતા. વ્યક્તિગત નુકસાન છતાં, રઝા હંમેશા તેની ટીમને સમર્પિત રહ્યા છે. જો કે આ ઘટના બાદ તે ક્રિકેટમાંથી થોડો સમય બ્રેક લઈ શકે છે જેથી તે પોતાના પરિવાર સાથે રહી શકે. મોહમ્મદ મહદીને મંગળવાર, 30 ડિસેમ્બરના રોજ હરારેના વોરેન હિલ્સ કબ્રસ્તાનમાં દફનાવવામાં આવ્યા હતા. આ દરમિયાન રઝાના પરિવારની સાથે ક્રિકેટ જગતના ઘણા સભ્યો પણ હાજર હતા.
રઝા સપ્ટેમ્બરમાં ODIમાં ICC ઓલરાઉન્ડર રેન્કિંગમાં નંબર વન ઓલરાઉન્ડર પણ બન્યો હતો. સિકંદર રઝા હાલમાં દુબઈ કેપિટલ્સના કેપ્ટન તરીકે ILT20માં રમી રહ્યો છે. રઝાએ અંગત દુઃખના કારણે કેટલીક મેચોમાંથી બ્રેક લીધો છે, પરંતુ આશા છે કે તે ટુર્નામેન્ટના નોકઆઉટ સ્ટેજ (પ્લેઓફ) માટે ટીમમાં પરત ફરી શકે છે. 2026ની શરૂઆતમાં ઝિમ્બાબ્વે માટે સૌથી મહત્વની ઘટના T20 વર્લ્ડ કપ હશે, જે ભારત અને શ્રીલંકામાં યોજાશે. આ ટૂર્નામેન્ટમાં ઝિમ્બાબ્વેની પ્રથમ મેચ 9 ફેબ્રુઆરીએ ઓમાન સામે થશે.
